Հայտնի է, որ «Օրինաց երկիր» կուսակցության նախագահ Արթուր Բաղդասարյանը շարունակում է մնալ Ազգային անվտանգության խորհրդի անդամ, թեև այլևս այդ կառույցի քարտուղարը չէ: Ա. Բաղդասարյանը ԱԱԽ քարտուղարի պաշտոնից հրաժարական տվեց մի քանի ամիս առաջ՝ ՕԵԿ-ն ընդդիմություն հռչակելուց հետո:
ԱԱԽ-ում Ա. Բաղդասարյանի նախկին մամլո խոսնակ Արթուր Միսակյանը «Առաջին լրատվական»-ի հետ զրույցում ասաց, թե նա ՀԱՊԿ ակադեմիայի խորհրդի նախագահն է, այդ պաշտոնում ընտրվել է մի քանի ամիս առաջ՝ այդ կառույցի Անվտանգության խորհրդի քարտուղարների կոմիտեում:
«Անվտանգության խորհուրդը խորհրդակցական մարմին է, և պարոն Բաղդասարյանը շուրջ 6 տարվա կուտակած մեծ փորձ ունի անվտանգության ոլորտի խնդիրների թե՛ ճանաչողության, թե՛ լուծման առումով: Իսկ ակադեմիան առնչվում է Հայաստանի անվտանգության խնդիրներին: Այնպես որ՝ Ա. Բաղդասարյանը կարող է լինել ԱԱԽ անդամ ու իր փորձով օգտակար լինել մեր երկրին»,- ասաց Ա. Միսակյանը:
Հարցին՝ բայց չէ՞ որ Ա. Բաղդասարյանի՝ ԱԱԽ կազմում լինելը նույնպես ինչ-որ առումներով ստվերում է կամ կասկածի տակ դնում նրա ու ՕԵԿ-ի ընդդիմադիր լինելը: Այսինքն՝ Ա. Բաղդասարյանը շարունակում է մնալ մի կառույցի անդամ, որտեղ հիմնականում բարձրաստիճան պաշտոնյաներ են, Միսակյանը պատասխանեց. «Եթե դու իշխանության մեջ չես, դու ընդդիմություն ես. մեր պարագայում չի լինում մի քիչ ընդդիմություն, մի քիչ շատ ընդդիմություն: Մենք հստակ հայտարարել ենք, որ ՕԵԿ-ն ընդդիմություն է: Իսկ ԱԱԽ-ն խորհրդակցական մարմին է, որտեղ ընդդիմություն և իշխանություն լինելը կորցնում է իր առաջնային նշանակությունը»:
Հիշեցնենք, որ Ա. Բաղդասարյանը ԱԱԽ-ում երկրորդ անդամն է, որ կոալիցիայում չէ, իշխանության մեջ չէ: Առաջինը «Բարգավաճ Հայաստան» կուսակցության ղեկավար Գագիկ Ծառուկյանն է: Խորհրդի մյուս անդամներն են՝ ԱԺ նախագահ Գալուստ Սահակյանը, վարչապետ Հովիկ Աբրահամյանը, փոխվարչապետ Արմեն Գևորգյանը, պաշտպանության նախարար Սեյրան Օհանյանը, արտգործնախարար Էդվարդ Նալբանդյանը, նախագահի աշխատակազմի ղեկավար Վիգեն Սարգսյանը, գլխավոր դատախազ Գևորգ Կոստանյանը, ԱԱԾ տնօրեն Գորիկ Հակոբյանը, ոստիկանապետ Վլադիմիր Գասպարյանը, պաշտպանության փոխնախարար Յուրի Խաչատուրովը և Ա. Բաղդասարյանն ու Գ. Ծառուկյանը:
ԲՀԿ-ն 2012թ. խորհրդարանական ընտրություններից հետո ՀՀԿ-ի հետ կոալիցիա չկազմեց, բայց Գ. Ծառուկյանը մինչև այժմ էլ շարունակում է մնալ ԱԱԽ անդամ: Նա այդ շրջանակներում հավանաբար շարունակում է կատարել իր որոշ պարտականություններ: Օրինակ՝ երբ Սերժ Սարգսյանը արտասահման է մեկնում, մամուլի հրապարակումների համաձայն, Գ.Ծառուկյանը նրան օդանավակայանում դիմավորում կամ ճանապարհում է, բայց նիստերին չի մասնակցում: Համենայնդեպս, ԱԱԽ վերջին՝ փետրվարի 25-ին տեղի ունեցած նիստի՝ նախագահականի կայքում տեղադրված լուսանկարներում նա չէր երևում:
Իսկ Ա. Բաղդասարյանը, ինչպես Գ. Ծառուկյանը, նույնպե՞ս շարունակում է Ս. Սարգսյանին դիմավորել և ճանապարհել:
«Ոչ»,- պատասխանեց Ա.Միսաքյանը՝ ավելացնելով, թե վերջին անգամ երբ Ս.Սարգսյանը Լատինաամերիկյան երկրներ էր մեկնում, ՕԵԿ ղեկավարը նրան չի ճանապարհել:
Լուսանկարը՝ Photolure-ի