ԲՀԿ նախագահ Գագիկ Ծառուկյանի մամուլի քարտուղարը, ըստ էության, չի հերքել տեղեկությունները, որոնք «Ժողովուրդ» օրաթերթն էր հրապարակել. որ նա արտասահմանից հրավիրված իմիջմեյքերների օգնությամբ նախագահական նիստուկաց է սովորում: Այսինքն՝ ԲՀԿ նախագահը պատրաստվում է նախագահական նիստուկացի, ասել կուզի՝ 2018 թվականին նա պատրաստվում է առաջադրվել:
Թեև, 2013-ից առաջ էլ Գագիկ Ծառուկյանը պատրաստվում էր, ըստ որում՝ ոչ թե իմիջմեյքերներ հրավիրելով, այլ ինքն էր գնացել Բրյուսել ու եվրոպական չինովնիկների շուրթերով հաղորդագրություններ էին գալիս, որ նրան իսկական նախագահական թեկնածու են տեսնում: Արդյունքում Ծառուկյանը նախագահական ընտրություններում չառաջադրվեց: Այնպես որ նիստուկաց սովորելն իրականում նախագահության թեկնածու առաջադրվելու կնիք չէ իհարկե:
Սա, սակայն, բնութագրում է Հայաստանում քաղաքական գործընթացների բնույթը: Այսինքն՝ այդ գործընթացներում, այսպես ասած, հասարակական մեսիջներ են դիտարկվում ոչ թե սկզբունքային և հստակ, կոնկրետ դիրքորոշումները օրակարգային համապետական նշանակության հարցերում, այլ նման, այսպես ասած, «աքսեսուարային» իրադարձություններն ու գործընթացները: Այլ կերպ ասած՝ սա ընդամենը «աքսեսուարային» քաղաքականության դրսևորում է, որով Հայաստանում զբաղված են բոլորը՝ և՛ իշխանությունների, և՛ ոչիշխանությունների դաշտում:
Սերժ Սարգսյանը զբաղված է լատինաամերիկյան տուրնե-աքսեսուարով, նրա գլխավոր «ընդդիմադիր» Գագիկ Ծառուկյանն էլ համալրում է իր «ընդդիմադիր» աքսեսուարների շարքը և չի հերքում նախագահական նիստուկացի պատրաստվելու մասին տեղեկությունները՝ ցույց տալու համար, որ զբաղվում է քաղաքականությամբ:
Չպետք է բացառել նույնիսկ, որ աշնանը ոչիշխանական քառյակը իշխանություններին նոր պահանջ ներկայացնի, արդեն նախագահական նիստուկացի կիրառման հետ կապված, պահանջելով, ենթադրենք, Սերժ Սարգսյանի համար դժվար նորամուծություններ, որոնք կիրառելու անկարողության արդյունքում քառյակը պառլամենտում կբարձրացնի Սերժ Սարգսյանի անգործունակության հարցը: Այսինքն՝ նախագահական նիստուկացը այն կռվանն է, որով, ի վերջո, հմուտ մարտավարության արդյունքում ոչիշխանական ուժերը կհասնեն Սերժ Սարգսյանի իմպիչմենտի իրավական անկասելի հիմքերին: Առավել ևս, որ Գագիկ Ծառուկյանի մրցակից Հովիկ Աբրահամյանը, որը ևս ակնհայտորեն ակնկալում է լինել հանրապետության հաջորդ նախագահը, կարծեք թե ևս խնդիրներ ունի նիստուկացի հետ կապված, որոնք դրսևորվեցին դեռ ԱԺ նախագահի պաշտոնում նրա եվրոպական այցերից մեկի ժամանակ՝ «ճոխ զավտրիկի» հայտնի պատմությամբ:
Հավանական է նաև, որ Գագիկ Ծառուկյանն ուսումնասիրել է մրցակցի թույլ կողմերը և պատրաստվում է նրա հանդեպ առավելության: Առավել ևս, որ նա այդ թույլ կողմերն ուսումնասիրելու մեծ հնարավորություններ ունի, քանի որ ունի Հովիկ Աբրահամյանի հետ ոչ պաշտոնական միջավայրում էլ շփվելու հնարավորություններ:
Լուսանկարը՝ shamshyan.com-ի
