Ավանդույթի համաձայն` այսօր Վերահսկիչ պալատի նախագահ Իշխան Զաքարյանը խորհրդի նիստից հետո հրավիրեց մամլո ասուլիս, որի ընթացքում քննարկվեց աշխատանքի և սոցիալական հարցերի նախարարության` սոցիալական ապահովությանը պետական բյուջեից հատկացված միջոցների հատկացումն ու օգտագործումը, ինչպես նաև Վերահսկիչ պալատի խորհրդի 2010 թվականի սեպտեմբերի 10-ի, 24-ի և նոյեմբերի 8-ի մի քանի որոշումների համաձայն իրականացված աշխատանքների արդյունքների վերաբերյալ ընթացիկ հաշվետվությունը:
Իշխան Զաքարյանի խոսքերով, ստուգման արդյունքները վերաբերում են 2010 թվականի հոկտեմբերի 1-ին, երբ դեռևս նախագահում էր Վազգեն Խաչիկյանը, իսկ ստուգումները վերաբերում են թոշակի և նպաստի վճարման ոլորտներին:
Իշխան Զաքարյանի խոսքերով, Վերահսկիչ պալատի կողմից ստուգվել են սոցիալապահովության պետական ծառայության 51 տարածքային բաժիններից 14-ը` Կենտրոն, Քանաքեռ-Զեյթուն, Նոր-Նորք, Ավան, Արաբկիր, Շենգավիթ, Մաշտոց, Էրեբունի, Նուբարաշեն, Դավիթաշեն, Մալաթիա-Սեբաստիա, Գյումրի, Վանաձոր, Արարատ, Արտաշատ, Մասիս տարածքային բաժանմունքները:
«Ստուգված 14 տարածքային բաժիններում մեր խնդիրն է եղել թոշակ-նպաստ համակարգում բացահայտել ընդհանրական խախտումները: Ստուգման արդյունքում արձանագրվել են բազմաթիվ խախտումներ, օրինակ` մահացած կենսաթոշակառուներին վճարված գումարներ: 2008, 2009, 2010 թվականների 8 ամիսների կտրվածքով ՀՀ մահացած կենսաթոշակառուների թիվը եղել է 58,921 հոգի, Վերահսկիչ պալատի կողմից ստուգվել է 843 գործ, հայտնաբերվել է 581 տարաբնույթ խախտում»,-պարզաբանեց Իշխան Զաքարյանը և խոսեց օրինակներով:
Մահացած կենսաթոշակառուներին վճարվել է դեպոնենտային գումար, օրինակ` 2005 թվականի օգոստոսին մահացած կենսաթոշակառու Վ.Վ.Մելքոնյանը 2009 թվականի հուլիսին դիմում է գրել և ստացել 1,244,040 դրամի չափով դեպոնենտային գումար, այնինչ Վերահսկիչ պալատի կողմից հանգուցյալի բնակարանի ստուգումների արդյունքում հանգուցյալի հարսը դիմում է գրել, որ սկեսուրը մահացել է 2005 թվականի օգոստոսի 14-ին և նշված ամսաթվից հետո թոշակ չի ստացել. օրենքի համաձայն` երբ կենսաթոշակառուն մահանում է, նրա թոշակը պետք է դադարեցվի, սակայն ստուգումները ցույց են տվել, որ մահացածի անվամբ վճարումները շարունակվում են:
Հայաստանում 14,287 կենսաթոշակառուներ կան, որոնց 2008-2009 թվականներին դեպոնենտ պետք է վճարեն: Վերահսկիչը ստուգել է 1,656 գործ և հայտնաբերել 1,157 խախտում: Ստուգումները ցույց են տվել, որ արդեն վճարված ժամանակաշրջանի համար կատարվել է կրկնակի վճարում:
Օրինակ` կենսաթոշակառու Աշոտ Մ.-ին 2008 թվականին միանվագ վճարվել է 6 ամսվա կենսաթոշակ, 3 ամիս անց նույն ժամանակաշրջանի համար կատարվել է կրկնակի վճարում կամ վճարումից հետո տեղեկատվական բազայում ներկայացվել է որպես չվճարված:
Հետաքրքիր է նաև արդեն 15 տարի ԱՄՆ-ում բնակվող Ղևոնդ Տոնոյանի և Մարգո Մկրտչյանի օրինակը: Վերջիններս Հայաստանում են եղել 4-5 տարի առաջ, 2009 թվականին չեն վերադարձել Հայաստան, այնինչ նոյեմբերի 3-ին ստացել են 842,430 և 978,261 դրամ կենսաթոշակ:
Հարկ է նկատել, որ եթե կենսաթոշակառուն չի բնակվում Հայաստանում, վերադառնալու դեպքում դիմումի համաձայն կարող է ստանալ վերջին երեք տարվա կենսաթոշակը: Այս քաղաքացիները Հայաստան չեն վերադարձել, բայց վերջին երեք տարվա թոշակը ստացել են:
Խախտումները շատ են նաև վետերաններին կատարվող վճարումների հետ կապված: Օրինակ` 2007 թվականին մահացած վետերան Արտակ Սարգսյանը մինչև Վերահսկիչ պալատի ստուգումները շարունակել է պատվովճարներ ստանալ: Կամ նախկինում պատվովճար ստացող վետերանը ընթացքում այլ երկրի քաղաքացի է դարձել, ինչի արդյունքում նրան կատարվող վճարումը պետք է դադարեցվեր, այնինչ շարունակվել է:
Նմանօրինակ փաստերի վերաբերյալ Վերահսկիչ պալատը զեկուցել է Սերժ Սարգսյանին, որն էլ աշխատանքից ազատել է սոցիալական ապահովության պետ Վազգեն Խաչիկյանին:
Արդյունքում` 2011 թվականի հունվարից թոշակառուների վճարումը ՀՀ կառավարության որոշմամբ իրականացնում է Հայփոստ ընկերությունը: Իշխան Զաքարյանը օրերս կրկին հանդիպել է Հայփոստի ղեկավարության հետ և զեկուցել Սերժ Սարգսյանի հրահանգը. «Կա կենսաթոշակառու` կա վճարում, չկա կենսաթոշակառու` ուրեմն ցանկացած վճարում խստորեն պատժվելու է: Ես ներկայացրի առավել ցայտուն օրինակները, իսկ արդյունքում ինչքան գումար է փոշիացել, ինչքանով կմաքրվեն ցուցակները և ինչքան գումարներ կնախատեսվի` ցույց կտա ժամանակը»,- եզրափակեց Իշխան Զաքարյանը:
