Հայաստանի ազգային ագրարային համալսարանը այս ուսումնական տարի ընդունելության 2 փուլերի ընթացքում 1461 տեղի դիմաց 1028 դիմորդ է ունեցել: Այս մասին «Առաջին լրատվական»-ի հետ զրույցում ասաց Հայաստանի ազգային ագրարային համալսարանի ուսումնական գծով պրոռեկտոր Յուրի Մարմարյանը՝ հավելելով, թե ստույգ տվյալներ իրենց բուհ ընդունված դիմորդների մասին դեռ բուհին չեն տրամադրվել։
«Այս ուսումնական տարվա ընդունելությունը մեր համալսարանի համար առանձնահատուկ էր, քանի որ, կառավարության որոշմամբ, 36 մասնագիտություններից շուրջ 23-ի դեպքում, որոնք ուղղված են գյուղատնտեսության և ագրոպարենային ոլորտին, թույլատրվել է բուհ ընդունվել առանց միասնական քննությունների, միայն ատեստատի գնահատականներով կամ ավարտական գնահատականներով վճարովի համակարգում»,- ասաց Յուրի Մարմարյանը՝ պարզաբանելով, որ մնացած 13 մասնագիտությունների համար քննություններն անցկացվել են այնպես, ինչպես նախկինում: Ըստ պրոռեկտորի՝ բուհ ընդունվելու գործընթացը դյուրացնելը ինքնանպատակ չէ. «Նախարարը բազմիցս ասել է՝ այո, պետք է մուտքը բուհեր հեշտացնել, ելքը դժվարացնել»:
«Առաջին լրատվականը» հետաքրքրվեց՝ արդյո՞ք ագրարային համլսարանում ելքը բարդացված է, կամ կրթական ինչպիսի՞ միջավայր է, քանի որ բուհը միշտ կոռուպցիայի մասին մամուլի լուսաբանումների կենտրոնում է լինում, ասում են՝ այստեղ սովորելու ընթացքում նույնիսկ օղիով կարելի է գնահատական ստանալ: Պրոռեկտորը բարկացավ ու հակադարձեց. «Կիրթ մարդիկ ենք, էսպես ապրիորի որևէ բան մի ասեք, անուն ազգանուն ասեք։ Մամուլի լուսաբանումներն ինձ չեն հետաքրքրում։ Խորհուրդ եմ տալիս գալ նստել, քննությունների կարգը տեսնել. ամեն լսարանում գտնվում է դեկանատի, ամբիոնի, ռեկտորատի ներկայացուցիչ, բոլոր քննությունները գրավոր են, տետրերի վրա ստորագրություն կա»։ Իր ասելիքը պրոռեկտորը եզրափակեց քննական տետրերը ցույց տալով։ Ըստ նրա՝ անգամ քննության վերհանձնումն է իրենց մոտ գրավոր:
Առավել մանրամասն՝ տեսանյութում։