Այսօր աշխարհահռչակ ռոք-կիթառահար, երգիչ ու երգահան Ջիմի Հենդրիքսի ծննդյան օրն է. նա կդառնար 70 տարեկան:
Ջիմի Հենդրիքսը ծնվել է 1942 թ. նոյեմբերի 27-ին ԱՄՆ-ի Վաշինգտոն նահանգում՝ Սիեթլում, զինվորականի ընտանիքում և ստացել է Ջոնի Ալեն անունը: Ավելի ուշ հայրը փոխել է որդու անունը՝ դարձնելով Ջեյմս Մարշալ։
1951 թ. տղայի ծնողները բաժանվում են, իսկ 1958 թ. մահանում է նրա մայրը: Ջիմին լքում է դպրոցը և իր ամբողջ ազատ ժամանակը տրամադրում կիթառ նվագելուն և Բի Բի Քինգի, Մադի Ուոթերսի և Էլմոր Ջեյմսի ձայնագրությունները լսելուն:
Ջիմ Հենդրիքսի առաջին խումբը եղել է The Velvetones-ը, որից հետո նվագել է The Rocking Kings (1959), Thomas & The Tomcats (1960) խմբերում:
1961 թ. նա զորակոչվում է բանակ, որտեղ ծառայում է դեսանտային զորքերում: Ծառայության ընթացքում Ջիմին ծանոթանում է Բիլ Կոքսի հետ և նրանք միասին ստեղծում են King Kasuals խումբը:
1964 թ. Ջիմի Հենդրիքսը տեղափոխվում է Նյու Յորք, որտեղ Մորիս Ջեյմս ծածկանվամբ սկսում է աշխատել որպես հրավիրված կիթառահար Սեմ Կուկի, Թինա Թյորների և The Isley Brothers խմբի հետ: Որոշ ժամանակ նա նվագել է Լիթլ Ռիչարդի խմբում, սակայն նրանց փոխհարաբերությունները այդքան էլ լավ չեն ձևավորվել, և նա հեռանում է՝ հիմնելովThe Rainflowers խումբը, որը հետագայում անվանափոխվում է The Blue Flames-ի: Փոխվում է նաև կիթառահարի կեղծանունը. նա դառնում է Ջիմի Ջեյմս:
Այս ժամանակաշրջանում նա ծանոթանում է Animals խմբի նախկին անդամ Չես Չենդլերի հետ, որը օգնում է Ջիմիին հաստատվել Լոնդոնում և 1966 թ. աշնանը ստեղծել Jimi Hendrix Experience խումբը, որի կազմում, բացի Հենդրիքսից, մտնում էին թմբկահար Միթչ Միթչելը և բաս-կիթառահար Նոել Ռեդինգը:
Կարճ ժամանակաընթացքում Հենդրիքսը դառնում է Լոնդոնի երաժշտական շրջանակնների խոսակցությունների գլխավոր թեման:
Հենդրիքսի առաջին Hey Joe սինգլը 1967 թ. սկզբներին գլխավորում է բրիտանական չարտերը, որին հաջորդում են Purple Haze, The Wind Cries Mary, Fire կատարումները և տրիոյի Are You Experienced առաջին ալբոմը:
Համերգներին Հենդրիքսը հանդես էր գալիս վառ բեմական հագուստով, կիթառ էր նվագում ատամներով, եղունգներով: 1967 թ. մարտի 31-ին համերգներից մեկի ժամանակ նա այրում է կիթառը, որից հետո հայտնվում է հիվանդանոցում ձեռքի այրվածքներով: Այս բեմական հնարքը հետագայում կիրառվում է նրա կողմից Fire երգի կատարման ժամանակ:
1967 թ. թողարկվում է խմբի երկրորդ ալբոմը՝ Axis Bold as Love-ը, իսկ մեկ տարի անց լույս է տեսնում ԱՄՆ-ում ձայնագրված Electric Ladyland ալբոմը:
1968 թ. խումբը սկսում է քիչ շրջագայել և կենտրոնանում է ստուդիական աշխատանքի վրա: Ջիմին ստուդիա է ձեռք բերում Նյու Յորքում և շատ փորձեր է անցկացնում դրանում: Խմբում սկսում են տարաձայնություններ, որոնց պատճառ են դառնում Հենդրիքսի և Ռեդինգի միջև վեճերը և հին ընկերների հետ վերամիավորվելու՝ Ջիմիի մոտ ծագած գաղափարը:
1969 թ. փետրվարի 24-ին Ջիմի Հենդրիքսի խումբը ելույթ է ունենում Լոնդոնի «Ալբերտ Հոլ» համերգասրահում: Համերգը ձայնագրված է և համարվում է խմբի վերջին պաշտոնական ելույթը: Դրանից հետո խումբը շրջագայում է ևս կես տարի: 1969 թ. Դենվերում տեղի ունեցած համերգից հետո խումբը լքում է Նոել Ռեդինգը:
1969 թ. Ջիմին խնդիրներ է ունենում օրենքի հետ: Նա ձերբակալվում է Տորոնտոյի օդանավակայանում այն բանից հետո, երբ նրա ճամպրուկում հայտնաբերվում է թմրանյութ: Սակայն 10 հազար դոլար գրավի դիմաց նա ազատ է արձակվում:
Նույն թվականին Ջիմին ստեղծում է Band Of Gypsys խումբը, որի կազմի մեջ մտնում են նրա բանակային ընկերը և ամերիկացի հայտնի թմբկահար Բադի Մայլզը: Որոշ ժամանակ անց նա The Experience խումբը վերածնելու անհաջող փորձ է կատարվում, որի արդյունքում ստեղծվում է Cry Of Love խումբը: Վերջինիս կազմի մեջ մտնում են The Jimi Hendrix Experience և Band Of Gypsys խմբերի երաժիշտները՝ Հենդրիքսը, Կոքսը և Միթչելը:
1970 թ. օգոստոսի 1-ին կայանում է Հենդրիքսի վերջին ելույթը ԱՄՆ-ում, իսկ օգոստոսի 30-ին՝ Մեծ Բրիտանիայի Isle of Wight փառատոնում: Վերջին անգամ Ջիմին ելույթ է ունեցել 1970 թ. սեպտեմբերի 6-ին Դանիայի Isle of Fehmarn փառատոնում:
1970 թ. սեպտեմբերի 18-ին Ջիմի Հենդրիքսին մահացած են գտնում Լոնդոնի Samarkand հյուրանոցի համարում: Այդ ժամանակ նա ընդամենը 37 տարեկան էր: Պաշտոնական վարկածով, մահվան պատճառը համարվում է թմրանյութերի չարաշահումը:
Երաժշտի մահից հետո թողարկվում են երգերի հավաքածուներ, նոր ալբոմներ, որոնց մեծ մասը ստեղծվում են Ջիմի Հենդրիքսի չավարտված ստուդիական ձայնագրությունների հիման վրա:
