Սիրիայի քրդերը որոշել են միավորել իրենց ուժերը՝ հանրապետությունում դաշնային պետություն ստեղծելու համար, որում քրդական փոքրամասնությունը ձեռք կբերի ինքնիշխանություն: Այս մասին հաղորդում է ITAR-TASS-ը՝ վկայակոչելով Էրբիլից (Իրաք) եկած հաղորդագրությունները, որոնց համաձայն՝ այս հարցի շուրջ համաձայնագիր է ձեռք բերվել «Ժողովրդավարական միություն» կուսակցության և Քրդական ազգային խորհրդի միջև:
Կողմերի միջև բանակցությունները հաջող են անցել Իրաքի քրդերի առաջնորդ Մասուդ Բարզանիի միջնորդության շնորհիվ:
Երկկողմ համաձայնագրի համաձայն՝ կուսակցությունները պայմանավորվել են անվտանգության համատեղ ծառայություն ստեղծելու, ռազմական կազմակերպությունները միավորելու և սահմանային շրջաններում համատեղ պարեկություն անելու վերաբերյալ: Երկու խմբավորումները Դամասկոսից պահանջում են Սիրիայի դաշնության և իրավունքների շրջանակներում ինքնավարություն շնորհել քրդերին, որից նրանք զրկվել են Հաֆեզ և Բաշար Ալ-Ասադների վարչակարգերի օրոք:
Այնուամենայնիվ, երկու կուսակցությունները տարբեր վերաբերմունք ունեն Սիրիայի ընդդիմադիր և հեղափոխական ուժերի ազգային կոալիցիայի նկատմամբ: «Ժողովրդավարական միություն» կուսակցությունը, որը սերտ կապեր ունի Քրդստանի աշխատավորական կուսակցության հետ, հանդես է գալիս Սիրիայի ազգային կոալիցիայի դեմ: Քրդական ազգային խորհուրդը, որի մեջ մտնում են տարբեր խմբավորումներ, տատանվում է այս հարցի շուրջ:
Երկու խմբավորումներն էլ դեմ են հանդես գալիս մասնավորապես Թուրքիայի և Կատարի կողմից սիրիական ճգնաժամին արտաքին միջամտությանը:
