«Ուրբաթ օրվա դրությամբ Վալերի Հովհաննիսյանը համարյա անգիտակից վիճակում էր, արնահոսում էր, ճնշման հետ խնդիր ուներ, թույլ էր: Ես կարծում եմ, որ նման պայմաններում քննչական գործողությունները պետք է բացառվեին ժամանակավորապես, որովհետև առկա էր բժշկի համապատասխան եզրակացությունը: Ցավոք, լիազոր մարմինը գտավ, որ պետք է կատարվեն քննչական գործողություններ, և աղիքը կախված վիճակում իմ պաշտպանյալին պատգարակով, շտապօգնության մեքենայով տարան դատարան, ապա` մեկուսարան» ,- «Առաջին լրատվական»-ի հետ զրույցում ասաց «Վերնիսաժի» կրակոցների դեպքի մասնակից Վալերի Հովհաննիսյանի պաշտպան Լևոն Բաղդասարյանը:
Նա մեզ տեղեկացրեց, որ իր պաշտպանյալին մեղադրանք առաջադրելուց հետո ինքը չի կարողանում իր գործառույթներն իրականացնել, քանի որ մինչ օրս, կալանավորումից մոտ 6 օր անց, չկա քննիչի համապատասխան թույլտվությունը, որպեսզի ինքն ազատ ելումուտ ունենա իր պաշտպանյալի մոտ, խորհրդակցի նրա հետ և սահմանված կարգով բողոք ներկայացնի:
Նշենք, որ ուրբաթ օրը Վալերի Հովհաննիսյանը, ով մինչ այդ գտնվում էր հիվանդանոցում և անգիտակից վիճակում էր, ճանաչվել է որպես մեղադրյալ, ապա պատգարակով տեղափոխվել է դատարան և կալանավորվել է: Նրան մեղադրանք է առաջադրվել Քրեական օրենսգրքի 258-րդ հոդվածի 3-րդ մասի հատկանիշներով (խուլիգանություն, որը զուգորդվել է անձի նկատմամբ բռնություն գործադրելով կամ դա գործադրելու սպառնալիքով, ինչպես նաև ուրիշի գույքը ոչնչացնելով կամ վնասելով): Հովհաննիսյանի պաշտպանը, սակայն, գտնում է, որ այդ մեղադրանքը չի կարող վերաբերել իր պաշտպանյալին: Նրա խոսքով` Վալերի Հովհաննիսյանին այդ վիճակում կալանավորելու հարցով ինքը պատրաստվում է հասնել մինչև Եվրոպական դատարան: «Անձին մեղադրանք են առաջադրում այն պարագայում, երբ անձը բացարձակ չի գիտակցում, թե ինչի մասին է խոսքը: Դա և՛ մեր Սահմանադրության, և՛ Եվրոպական կոնվենցիայի խախտում է: Դրա հետ կապված ես պատրաստ եմ հասնել մինչև Եվրոպական դատարան»,- ասաց Բաղդասարյանը:
Հիշեցնենք, որ Վալերի Հովհաննիսյանից բացի, այս գործով կա ևս երկու մեղադրյալ՝ Նորայր Մելքոնյանը, ում գրեթե նույն կարգավիճակում կալանավորեցին և տեղափոխեցին մեկուսարան, և ԱԺ ԲՀԿ-ական պատգամավոր Կարո Կարապետյանի (Յուվեցի Կարո) փեսան՝ Գոռ Առաքելյանը, ում մեղադրանք է առաջադրվել ՔՕ 34-104 հոդվածի 2-րդ մասի 1-ին, 6-րդ և 10-րդ կետերով (խուլիգանական դրդումներով սպանության փորձ, նախատեսում է 15 տարի ժամկետով կամ ցմահ ազատազրկում) և ՔՕ 235 հոդվածի 1-ին մասով (ապօրինի կերպով զենք կրելը, պատժվում է ազատազրկմամբ առավելագույնը երեք տարի ժամկետով):
Ստացվում է, որ արձակված 10-13 կրակոցի արդյունքում առկա է 3 մեղադրյալ և ոչ մի տուժող: Կրակոցների արդյունքում վիրավորված 2 անձը մեղադրյալ են, կրակոց արձակածը` ևս, իսկ պատահական վիրավորվածները բողոք չեն ներկայացնում:
Լուսանկարը՝ eMedia.am-ի