Մարտի 21-ին Հայաստանի արտգործնախարար Էդվարդ Նալբանդյանն ընդունեց ՄԱԿ-ի Առևտրի և զարգացման համաժողովի (UNCTAD) գլխավոր քարտուղար, դոկտոր Սուպաչայ Պանիտչպակդիին:
Ողջունելով հյուրին՝ Էդվարդ Նալբանդյանը գոհունակություն հայտնեց ՄԱԿ-ի Առևտրի և զարգացման համաժողովի քարտուղարության կողմից Հայաստանի մրցակցային քաղաքականության ոլորտում տարվող աշխատանքներին ցուցաբերած աջակցության կապակցությամբ:
ՄԱԿ-ի Առևտրի և զարգացման համաժողովի գլխավոր քարտուղարն բարձր գնահատեց Հայաստանի հետ հաստատված համագործակցությունը, և նշեց, որ Հայաստանում հաջողությամբ են ընթանում տնտեսական բնագավառի բարեփոխումները:
Հյուրի խնդրանքով Էդվարդ Նալբանդյանը ներկայացրեց Հայաստանի արտաքին տնտեսական կապերն ու դրանց խթանմանն ուղղված իշխանությունների քայլերը:
Սուպաչայ Պանիտչպակդին Հայաստանի արտգործնախարարին ներկայացրեց համաշխարհային ֆինանսատնտեսական ճգնաժամի հաղթահարման իր տեսլականը:
Զրույցի ընթացքում քննարկվեցին Հայաստանի մրցակցային քաղաքականության բարելավմանն ուղղված մի շարք հարցեր:
ՀՀ արտաքին գործերի նախարարություն
