Օֆշորային սկանդալի պարագլուխ Աշոտ Սուքիասյանի կողմից խաբեության զոհ դարձած գերմանացի Կուլինո ամուսինները Աշոտ Սուքիասյանից իրենց հասանելիք գումարները չստանալու դեպքում պատրաստվում են միջազգային աղմուկ բարձրացնել, դիմել դեսպանատուն և միջազգային այլ կառույցների: Սուքիասյանի արտահանձնումից հետո Կուլինոներին առհասարակ տեղյակ չեն պահել գործի ընթացքից: Մինչդեռ երբ նա գտնվում էր Վրաստանում, նախաքննական մարմինը գերմանացի ամուսիններին վստահեցնում էր, որ Սուքիասյանի՝ Հայաստան տեղափոխվելուց հետո գործով ակտիվ նախաքննություն կսկսվի, և ամեն ինչ կպարզվի:
«Ես հերթական բողոքն էի գրել դատախազություն, որը հասել էր քննիչին, և նա էլ պատասխանել էր, որ եթե նորություն լինի, մեզ տեղյակ կպահեն: Բայց մինչ օրս մեզ որևէ տեղեկություն չի հասնում: Այնպես է ստացվում, որ դեռ միայն Փայլակի մասով գործն են քննում: Հակառակ դեռպքում այս լռությունն անհասկանալի է»,- «Առաջին լրատվական»-ի հետ զրույցում ասաց Անյա Կուլինոն:
Հիշեցնենք, որ գերմանացի ամուսինները հավատալով Աշոտ Սուքիասյանի «անկեղծ մտադրություններին» ու նրա հավատացյալ բարեպաշտ կերպարին և վաճառելով Գերմանիայում գտնվող իրենց արժեքավոր բնակարանը՝ նրա «Ձորագյուղ» արտադրական կոոպերատիվին էին փոխանցել նախ՝ 80 հազար եվրո, ապա Հայաստան վերադառնալուց հետո՝ ևս 20 հազար եվրո: Գումարի դիմաց Սուքիասյանը ամուսիններին խոստացել էր՝ եթե նրանք այդ գումարը ներդնեն ադամանդի բիզնեսի մեջ, ինքը կվճարի Հայաստանում օրենքով ընդունված բանկային տոկոսի կրկնապատիկը, իսկ առաջին պահանջի դեպքում կվերադարձնի մայր գումարը: Հետագայում Կուլինոները ևս 37 հազար ԱՄՆ դոլար են տվել Սուքիասյանին: Սակայն այդ ամբողջ գումարից Անյա Կուլինոն միայն 15 հազար եվրոն է հետ ստացել, իսկ մնացածը մինչ օրս չի կարողանում ստանալ:
«Ես սպասում եմ տեսնեմ՝ նա ինչ ցուցմունք կտա, նոր կարձագանքեմ: Բայց եթե հանկարծ նրանք իմ հարցը չլուծեն, իմ փողը չվերադարձնեն, ապա ես ամբողջ աշխարհով, դեսպանատներով մեկ աղմուկ եմ բարձրացնելու»,- հավելեց նա:
Անդրադառնալով Աշոտ Սուքիասյանի պաշտպանի այն հայտարարություններին, թե Աշոտն անմեղ է և որևէ առնչություն չունի իրեն առաջադրված մեղադրանքին, տիկին Կուլինոն արձագանքեց. «Ո՞նց կլինի այդպես: Ինչպե՞ս կարող է Աշոտն անմեղ լինել: Դա անգրագիտություն է և խելքին մոտիկ չէ: Ասենք՝ լավ, ապացուցեց, որ ինքն ազնիվ է, կապ չունի բանկերի և Փայլակի ունեցվածքի դիմաց տրված փողերի անհետացման հետ, բայց ես հո փաստաթղթեր ունեմ, որոնցում երևում է, որ ես իրեն փող եմ տվել, և ինքը պարտավորվում է վերադարձնել այդ գումարները: Եթե ինքը հրաժարվի իմ գումարները վերադարձնելուց, ուրեմն իսկական հանցագործ է»:
Մեզ չհաջողվեց Սուքիասյանի պաշտպան Յուրիկ Խաչատրյանից պարզել՝ Սուքիասյանն իրեն մեղավոր ճանաչո՞ւմ է Կուլինոներին խաբելու համար իրեն առաջադրված խարդախության մեղադրանքում, թե՞ ոչ: Նրա հեռախոսն անհասանելի էր:
Նշենք նաև, որ բացի խարդախությունից՝ Աշոտ Սուքիասյանի դեմ ևս երկու մեղադրանք է առաջադրված՝ փողերի լվացում և խաբեությամբ գույքին վնասի պատճառում: Սակայն նրա փաստաբանն օրերս «Ազատություն» ռադիոկայանին ասել էր, որ իր պաշտպանյալն առաջադրված 3 մեղադրանքներում էլ իրեն մեղավոր չի ճանաչում: