Երբ Րաֆֆի Հովհաննիսյանը գնում էր Ադրբեջան, կուսակցական գործընկեր Ստյոպա Սաֆարյանը հուշել է, որ այցը բարդ է լինելու: Այդպես էլ եղավ: «Եթե միջազգային վեհաժողովներում ադրբեջանցիները խելոք գառնուկներ էին, սեփական հողում կարողանում են կազմակերպել ողորմելի մի վիճակ, երբ լարվածությունը զգացնել կտա: Տեսանելի է, որ Բաքվի իշխանությունները նման միջազգային կարևոր միջոցառումները բերելով իրենց երկիր, ունեն հատուկ նպատասկ՝ սեփական երկրում իրենց PR-ն անել, նաև միջազգային հեղինակավոր բանաձևերով բաներ կորզել՝ հօգուտ ԼՂՀ խնդիրն իրենց ցանկացածով կարգավորելու»,- «Երկիր Մեդիա» հեռուստաընկերության «Երկրի հարցը» հաղորդման եթերում ասել է «Ժառանգություն» կուսակցության գլխավոր քարտուղար Ստյոպա Սաֆարյանը:
Նրա խոսքերով՝ կարող էր Րաֆֆի Հովհաննիսյանը չմասնակցել Բաքվում կայանալիք միջազգային ասամբլեային, սակայն այն տարին մեկ անգամ է կազմակերպվում, և կարևոր էր ոչ միայն ասամբլեայում, այլև հենց Բաքվում Հայաստանի խոսքը հնչեցնելը: «Ադրբեջանական կայքերի և բլոգների տեսակետն էի ընթերցում, չափազանց տհաճ տպավորություն են թողնում սովորական քաղաքացիները, որ կոչ են անում որևէ հայ չմտնի Ադրբեջան»,- ասել է Ստյոպա Սաֆարյանը: Րաֆֆի Հովհաննիսյանն էլ մեկնել է միմիայն հավաստիացումից հետո, որ նոյեմբերի 23-ի լիագումար նիստում ելույթ կունենա: «Չափազանց անխոցելի ելույթ է, անդրադառնում է ագրեսիային, ԼՂՀ ճանաչմանը, ինքնորոշման իրավունքին, գերեզմանները պղծելուն, Սաֆարովին: Չկա մեզ հուզող որևէ դրույթ, որ տեղ չունենա նրանում»,- ասել է Ս. Սաֆարյանը՝ հավելելով, որ ելույթին նախորդած ճեպազրույցում Ր. Հովհաննիսյանի որոշ մտքեր սխալ են թարգմանվել և տարընթերցումների առիթ հանդիսացել, ինչը ամբողջությամբ ի չիք է դառնում ելույթով:
Մասնավորապես, «Ժառանգության» առաջնորդին մեղադրում էին, թե խոսել է հայ և ադրբեջանցի փախստականների՝ ԼՂՀ վերադարձի մասին, սակայն, ինչպես նշել է Ստյոպա Սաֆարյանը, Ր. Հովհաննիսյանը խոսել է բոլոր փախստականների իրավունքների ճանաչման մասին, այդ թվում՝ այն հայերի, որ փախել են Բաքվից, Սումգայիթից, Շահումյանից և այլ վայրերից: Ըստ Սաֆարյանի՝ սխալ է թարգմանվել նաև Րաֆֆի Հովհանիսյանի ելույթի այն հատվածը, որտեղ նա խոսում է Բաքվում 30 հազարանոց համայնքի իբրև գոյության և կամ Բաքվի հայկական եկեղեցու մասին:
«Գաղտնիք բացահայտեմ. նախկին գումարման խորհրդարանում մենք չհրապարակված նամակագրություն ենք ունեցել ԵԽԽՎ համազեկուցող Համերբերգի հետ, որ այցելում էր Ադրբեջան, և ասում էինք, որ Բաքուն ստում է, թե իրենք ունեն հայկական համայնք, թե հայկական եկեղեցին խաչ ունի գմբեթին: Այնպես որ, այդ ամենը գիտեր Րաֆֆի Հովհաննիսյանը: Նա պարզապես ասում է, որ կուզենար տեսնել մեկ հոգի այն հայկական համայնքից, որ Ադրբեջանն է նշում, թե կա»,- ասել է «Ժառանգության» գլխավոր քարտուղարը: Ս. Սաֆարյանի խոսքերով՝ եթե Րաֆֆի Հովհաննիսյանը չայցելեր Բաքու, անտեղ ընդունված բանաձևը չէր ունենա լեգիտիմության խնդիր, իսկ այսօր ունի, քանի որ ընդունվել է խախտումներով՝ առանց կոնսենսուսի:
