«ԳԹԿ-ն իրավասու չէ ճշգրտել՝ ի՞նչ խախտումներ են եղել ներբուհական քննությունների ընթացքում. մեզ ընդամենը որոշ ներբուհական քննություններից արձանագրություններ են հանձնվում»: «Առաջին լրատվական»-ի հետ զրույցում նշեց ԳԹԿ արտաքին համագործակցության բաժնի պետ Արա Իսպիրյանը՝ հավելելով, որ ԳԹԿ-ն միայն հաստատում է ներբուհական քննությունների հանձնաժողվի կազմը, որը կառավարությանը ներկայացնում է հենց բուհը: Ըստ նրա՝ ներբուհական քննությունների ընթացքը կազմակերեպվում և վերահսկվում է բուհ-ԿԳՆ շղթայում, իսկ ԳԹԿ-ն պատասխանատու է կենտրոնացված և միասնական քննությունների անցկացման , վերահսկողության համար:
Նշենք, որ միասնական քննությունների առաջին փուլից հետո մեկնարկած ներբուհական քննությունների ընթացքում դիմորդները, նրանց ծնողները սկսեցին բարձրաձայնել կամայական վերաբերմունքի և կոռուպցիոն դրսևորումների մասին: Բարձրաձայնումների առանցքում պոլիտեխնիկն էր և ֆիզիկական կուլտուրայի հայկական պետական ինստիտուտը:
Ֆիզկուլտինստիտուտում կոռուպցիոն դրսևորումների մասին հիմնականում խոսում են անանուն, դիմորդները չեն ցանկանում հրապարակային խոսել, քանի որ գումարի միջոցով կարողացել են նվազագույն միավորը ստանալ:
«Առաջին լրատվական»-ը այս հարցերի վերաբերյալ զրուցեց ֆիզիկական կուլտուրայի հայկական պետական ինստիտուտի ռեկտոր Վահրամ Առաքելյանի հետ: Ռեկտորը տեղեկացրեց, որ բուհում այս տարի 350 դիմորդ է եղել, որից բացակայել են 3-ը, մնացած բոլորը ընդունվել են: «Հանձնաժողովի անդամներին ասել եմ՝ լինեն բարի, շատ բարի. սոցիալական վիճակը, նյարդային համակարգը այն չի, ասել եմ՝ թող վերաբերվեն ինչպես իրենց երեխաներին: Միջին ցածր միավորներ ևս եղել են, իրենց 8-ը ստացել են, կտրվողներ չեն եղել»,- մանրամասնեց Վահրամ Առաքելյանը՝ հավելելով, որ բուհ ընդունվողներից 19-ը Եվրոպայի, աշխարհի մրցանակակիրներ են, որոնք ընդունվել են հարցազրույցով:
Այս տարի բուհում անվճար տեղերը կրճատվել են. նախորդ տարի եղել են 59, այս տարի՝ 50: Բուհի ռեկտորից հետաքրքրվեցինք, թե քննության ընթացքն ինչպե՞ս է վերահսկվում. տեսախցիկներ կա՞ն, արձանագրություններ կազմվո՞ւմ են, թե՞ ոչ: Նա պատասխանեց, որ քննությունները հիմնականում գործնական են, տեսախցիկներ չկան: «Մենք ծնողներին էլ ենք ներս թողնում»,- մանրամասնեց ռեկտորը՝ պարբերաբար նշելով, որ քննություններն անցնում են ըստ կարգի, շեղումներ չեն լինում:
Անդրադառնալով բուհում կոռուպցիայի վերաբերյալ ահազանգերին՝ Վահրամ Առաքելյանը ընդգծեց. «Վա՜յ, ի՞նչ եք ասում. ես առաջին անգամ եմ լսում: Այսօր ինչի՞ փող պիտի տան ընդունվեն: Զարմանում եմ. կոռուպցիոն հարցեր բոլոր տեղերում էլ կան, բայց ինձ հետ կապված, մեր բուհի հետ կապված՝ չեմ լսել: Բոլորին հավաքում ենք. դասախոսներին, ծնողներին, մինչև այսօր բողոքներ չենք լսել»:
Հիշեցնենք՝ բուհի շուրջ պարբերաբար մտահոգություններ են հնչում կուսակցականացվելու վերաբերյալ. ուսանողները հիմնականում հարում են ԲՀԿ-ին: Անդրադառնալով այս հարցին՝ ռեկտորն ընդգծեց. «Մեր բուհի խորհրդի նախագահ Ծառուկյան Գագիկ Նիկալիչը չի եղել դեպք, որ գա, կուսակցական թեմաներով խոսի: Մեր ուսանողությունը ո՛չ հացադուլի, ո՛չ դասադուլի չի մասնակցել, միշտ հավաքների, մրցույթների են եղել»:
Վահրամ Առաքելյանը նաև ընդգծեց, որ այլ կուսակցություններին հարող ամբիոնի վարիչներ ունեն՝ դաշնակցական, ՕԵԿ-ական, Հանրապետական: «Թույլ չենք տվել ո՛չ «Բարգավաճը» ագիտացիա կատարի, ո՛չ իրենք»,- եզրափակեց ռեկտորը:
Առավել մանրամասն՝ տեսանյութում:
