ԵՄ-ն պատրաստ է Հայաստանին ևս մեկ հնարավորություն տալ՝ վերադառնալու Ասոցացման համաձայնագրին: «Առաջին լրատվական»-ի հետ զրույցում այս մասին ասաց Գլոբալիզացիայի և տարածաշրջանային համագործակցության վերլուծական կենտրոնի խորհրդի նախագահ Ստեփան Գրիգորյանը՝ անդրադառնալով Հայաստանի եվրասիական ինտեգրացիայի գործընթացին և ձգձգման պատճառներին:
Նրա կարծիքով՝ Հայաստանը չի միանա եվրասիական ինտեգրացիոն պրոյեկտներին: Ըստ նրա՝ Հայաստանը կմիանա, եթե ստացվի վերապահում Ղարաբաղի հարցում՝ հօգուտ Հայաստանի: Սակայն դա էլ Ստեփան Գրիգորյանը քիչ հավանական է համարում, քանի որ Ռուսաստանը հետաքրքրված է այդ պրոյեկտներում Ադրբեջանի անդամակցությամբ, որի ճանապարհին չի անի քայլեր հօգուտ Հայաստանի:
«Քանի որ Ադրբեջանը չի գնա Եվրասիական միություն, մենք էլ չենք դառնա Եվրասիական միության անդամ՝ Հայաստանն այդ պրոյեկտներում անհրաժեշտ է Ռուսաստանին Ադրբեջանին ևս ներքաշելու համար»,- պարզաբանեց Ստեփան Գրիգորյանը:
Անդրադառնալով ՀՀ-ԵՄ ապագա հարաբերություններին՝ նա ասաց, որ դժվար է ասել, թե այս անորոշ փուլում ինչ հստակ պայմանավորվածություն կարող են ունենալ ՀՀ-ն ու ԵՄ-ն: Նա հիշեցրեց, որ ընթանում են բանակցություններ, կողմերը փորձում են նոր ձևաչափ գտնել: Սակայն, նրա համոզմամբ, փնտրելն անիմաստ է, քանի որ պետք է վերադառնալ ԱՀ-ին:
«ԵՄ-ն պատրաստ է վերադառնալ Հայաստանի հետ ասոցացման օրակարգին՝ կասկած չկա, դրա մասին տասնյակ անգամ ասել են. եթե վերադառնանք, պարզ է՝ ինչ-ինչ փուլեր պետք է անցնենք, մեր առջև խնդիրներ կդնեն, որ մեկ անգամ ևս չհիասթափեցնենք Եվրոպական միությանը»,- ասաց Գրիգորյանը:
Առաջարկում ենք մանրամասներին ծանոթանալ տեսանյութի միջոցով:
