Ուկրաինայի զինված ուժերն ու նորընտիր նախագահ Պյոտր Պորոշենկոն ուժերը կենտրոնացրել են Ուկրաինայի հարավ-արևելքում Կիևի նկատմամբ վերահսկողությունը սահմանելու ուղղությամբ: Օրերս հայտնի դարձավ, որ ապստամբները լքել են Սլավյանսկը, Կրամատորսկը՝ հաստատվելով Դոնեցկում, իսկ ուկրաինացի զինվորականները Սլավյանսկի քաղաքային խորհրդի շենքին բարձրացրել են Ուկրաինայի պետական դրոշը:
Ուկրաինայի նախագահ Պյոտր Պորոշենկոն սա համարել է նշանակալի իրադարձություն՝ նշելով. «Սա դեռ լիարժեք հաղթանակ չէ: Սակայն մինչև ատամները զինված մոլեռանդների հանցախմբերից Սլավյանսկը մաքրելը հսկայական խորհրդանշական նշանակություն ունի: Սա Ուկրաինայի տարածքային ամբողջականության համար մղվող պայքարում գրոհայիններին կոտրելու սկիզբն է՝ Դոնբասը, որպես եվրոպական մեծ, ուժեղ պետության մի մաս, նորմալ կյանքի վերադարձնելու համար»: Ուկրաինայի նախագահն ընդգծել է, որ մյուս քաղաքներն ու բնակավայրերը ևս ազատագրվում են:
«Առաջին լրատվական»-ի հետ զրույցում Դոնեցկի մարզի պատվո հյուպատոս Կարեն Յայլոյանն ասաց, որ հայ համայնքը գործում է, լավ է: Սակայն, նրա խոսքով, պարզ է, որ նախկինի նման չի կարող գործել համայնքը՝ այն ժամանակ խնդիրներ չկային, պատերազմ չկար, հիմա փոքր-ինչ թեթև ռեժիմով է աշխատում և նորմալ է:
«Խնդիրներ չկան հայ համայնքում: Համայնքը չի տուժում և չի միջամտում քաղաքականությանը, փորձում է հեռու մնալ: Մեզ անհրաժեշտ չէ ինչ-որ քաղաքական հարցերի խառնվել, հեռու ենք մնում ամեն ինչից, ինչի արդյունքում էլ գործընթացները հայ համայնքի վրա չեն անդրադառնում: Իսկ վտանգի մեջ են Ուկրաինայի բոլոր քաղաքացիները, ոչ միայն հայերը, ուստի պետք է հեռու մնալ բախումներից և այլնից, որպեսզի հնարավոր լինի խուսափել վտանգից»,- ասաց Կարեն Յայլոյանը:
Հարցին՝ իշխանության համար պայքարն անջատողականների և Կիևի իշխանությունների միջև հարավ-արևելքում, այնուամենայնիվ, ինչպե՞ս է անդրադառնում հայ համայնքի վրա, ի՞նչ տրամադրություններ կան, նա պատասխանեց՝ հայ համայնքը չի միջամտում ոչ մի գործընթացի:
«Առաջին լրատվական»-ի հետ զրույցում Ուկրաինայի Հայոց թեմի առաջնորդ Տ. Գրիգորիս արքեպիսկոպոս Բունիաթյանը նախ տեղեկացրեց, որ վերջին օրերին և ուկրաինական ճգնաժամի ողջ ընթացքում հայ համայնքին պատկանող եկեղեցիները, հայ համայնքը վնասներ չեն կրել, քանի որ կարողանում է պահպանել չեզոքությունը և հեռու է մնում բախումներից:
Նա նշեց, որ Կիևի ներկայիս իշխանությունների համար այդ շրջաններն իրենց վերահսկողության տակ առած մարդիկ ապստամբներ են պետության տեսանկյունից, նրանք խաղաղեցնող միջոցներ են ձեռք առնում և խաղաղեցնում Դոնբասը: Ըստ սրբազանի՝ արդեն երկու օր է, ինչ Ուկրաինայում, մասնավորապես՝ հարավ-արևելքում իրավիճակը խաղաղ է, բախումներ չկան:
«Հարավ-արևելքը Ուկրաինա է՝ ուկրաինաբնակ մեծամասնության պնդմամբ, իսկ Կիևի իշխանությունները փորձում են խաղաղեցնել, իրենց պնդմամբ, ապստամբներին, ահաբեկիչներին, և այդտեղ որևէ հայի խնդիր չկա, քանի որ հայերը չեն միջամտում որևէ հարցի»,- եզրափակեց նա: