Google ընկերությունը հայտարարել է, որ Չինաստանի իշխանությունները սահմանափակում են և արգելափակում են Gmail փոստային ծառայության աշխատանքը: Ընկերության հայտարարության մեջ ասվում է, որ Չինաստանի կառավարությունը դիտավորությամբ սահմանափակում է ծառայության աշխատանքը: Այս մասին հաղորդում է Associated Press գործակալությունը:
Google-ի հաղորդագրության մեջ նշվում է, որ որոշ ժամանակ առաջ իրենց օգտատերերը սկսել են բողոքել Google-ի փոստայի ծառայությունից` նշելով, որ լուրջ խնդիրներ են ունենում փոստային ծառայությունից օգտվելու, մուտք գործելու, նամակներ ստանալու և ուղարկելու ժամանակ: Ստուգելով այդ բողոքները, Google-ը պարզել է, որ իրենց ծառայության հետ որևէ խնդիր չկա: Այդ ամենը Չինաստանի համապատասխան ծառայությունների գործողությունների արդյունքն է: Չինաստանում պաշտոնապես անհնար է օգտվել Twitter միկրոբլոգների կայքից կամ YouTube կայքից:
The Financial Times-ը նշում է, որ այս ամենը կապված է Մերձավոր Արևելքում և Հյուսիսային Աֆրիկայում սկսված հեղափոխական շարժումների հետ, որոնց ազդեցությունը Չինաստանի ներքաղաքական զարգացումների վրա փորձում են նվազեցնել չինական համապատասխան ծառայությունները:
Մենք տեղեկացրել էինք, որ Չինաստանի իշխանությունները սահմանափակում էին մտցրել որոնողական համակարգերի վրա: Օրինակ՝ այնտեղ չէր կարելի փնտրել Եգիպտոս և հեղափոխություն, Թահրիր և Ժասմինի հեղափոխություն բառերը:
