Ամառվա տապին մեր հայրենակիցները մտածում են իրենց հանգիստը կազմակերպելու մասին, սակայն մինչ հանգիստը վայելելը՝ կանգնում են մի շարք խնդիրների առջև: Այս օրերին տոմսերի գները թանկանում են, ուստի Եվրոպա, Արաբական Միացյալ Էմիրություններ մեկնելը Վրաստանից ավելի մատչելի է:
Ցավոք, մեր շատ ու շատ քաղաքացիներ մի քանի տասնյակ հազար դրամ խնայելու համար կտրում-անցնում են 300 կմ և մեկնում Վրաստանից: Օրինակ՝ Երևանից Անթալիա կարելի է մեկնել 305 եվրոյով, Վրաստանից՝ շուրջ 200 դոլարով: Կան նաև կրկնակի մատչելի գներով տոմսեր. Երևանից Բարսելոն՝ Չեխիայով, արժե 650 եվրո, կամ Կիևով Բարսելոն՝ 370 եվրո՝ այն դեպքում, երբ թռիչքներն այս ուղղությամբ Երևանից ավելի շատ են, ինչը ենթադրում է որոշակի առումով գների իջեցում, սակայն Վրաստանից, օրինակ, Բարսելոն հասնելու համար բավական է շուրջ 200 դոլար: Վրաստանից Մոսկվա մեկնել կարող են շուրջ 120 դոլարով, Երևանից՝ շուրջ 175:
Ավիատոմսերի վաճառքով զբաղվող ընկերություններից մեկի օպերատոր Աիդա Ավետիսովան «Առաջին լրատվական»-ի հետ զրույցում ընդգծեց՝ չնայած ցանկալի է, որ մեր քաղաքաքացիները ավելորդ քաշքշուկից խուսափելու համար մեկնեն Երևանից, բայց մարդիկ նախընտրում են մեկնել Վրաստանից, Թուրքիայից:
«Այդպես որոշ ուղղություններով նրանք կարողանում են տոմսեր ձեռք բերել կես գնով, իսկ Եվրոպայի պարագայում անհամեմատ մատչելի է. օրինակ՝ Վրաստանից Ֆրանսիա գնալ-գալը արժենում է 150 եվրո, իսկ Հայաստանից Փարիզ՝ շուրջ 190 հազար դրամ, այն էլ այս սակագինը նոր է, նախկինում եղել է շուրջ 250 հազար դրամ»,- ասաց նա:
Աիդա Ավետիսովան Երևանում տոմսերի այսպիսի գնացուցակը հիմնականում բացատրում է հարկային բեռով: «Հարկերը շատ են՝ տարբեր սպասարկումներ առանձին տուրք ունեն, որոնք ներառված են տոմսի արժեքի մեջ»,- հստակեցրեց Աիդա Ավետիսովան՝ հավելելով, որ յուրաքանչյուր տոմսի արժեքի մեջ 30-35 հազար դրամը միայն տուրքն է: Օրինակ՝ Երևանից Կրասնոդար տոմսն արժե 19 հազար դրամ, սակայն դրան գումարվում է շուրջ 35 հազար տուրքը:
Փաստորեն մեր քաղաքացիների համար վրացական ավիաշուկան ավելի գայթակղիչ է, քան մերը՝ չնայած կառավարությունը պարբերաբար խոսում է բաց երկնքի քաղաքականության մասին: Հարևան Վրաստանը արդեն մի քանի տարի է՝ ազատականացրել է ավիափոխադրումների շուկան, ոչ միայն շեշտակի աճել են ավիափոխադրողների քանակը և մրցակցությունը, այլև նվազել են ավիատոմսերի գները: Իսկ մեզ մոտ ավիափոխադրումների շուկան ազատականացնելու գործընթացում միայն խոստումներ են տրվում ավելի մատչելի պայմանների մասին, սակայն իրական պատկերը բոլորովին այլ է:
