«Յունիբանկի» հետ դատական վեճի մեջ գտնվող գործարար, «Հին Էրիվան» ռեստորանային համալիրի սեփականատեր Մանվել Տեր-Առաքելյանը հիմա էլ հայտնվել է Երևանի քաղաքապետարանի թիրախում: Հասարակ բաներների տեղադրում, ռեստորանային համալիրի վրա գովազդային վահանակ-հեռուստացույց տեղադրելը հարուցում է քաղաքապետարանի արգելքը, որին հաջորդում է տուգանքը: Օրերս գործարարն իրեն պատկանող ռեստորանային համալիրի վրա միայն հետուստացույց փակցնելու պատճառով քաղաքապետարանի կողմից տուգանվել է 100 հազար դրամով, իսկ հետուստացուցը փակցնելու թույլտվությունը մերժվել է՝ նպատակահարմար չլինելու պատճառաբանությամբ:
«Ընդհանրապես, շատ վատ հարաբերություններ են քաղաքապետարանի հետ, և այդ կառույցը ամեն պարագայում փորձում է ինչ-որ մի բան անել, որպեսզի խոչընդոտի մեր գործունեությանը: Հին ասացվածք կա. երբ մեկն ընկնում է, դանակավորները շատանում են: Մարդկանց մեջ այնպիսի տպավորություն է, որ եթե ուրիշներն ինձ հետ այդպես են վարվում, ապա իրենք էլ պարտադիր պետք է այդպես վարվեն»,- «Առաջին լրատվական»,-ի հետ զրույցում ասաց գործարար Մանվել Տեր-Առաքելյանը:
Բացի դրանից՝ նա 2007-ին կես միլիոն դոլարով գնել է Կարապի լճի հարևանությամբ գտնվող «Օդեոն» սրճարանը, ապա քաղաքապետարանի կողմից ստացել է վերակառուցման թույլտվություն: Բայց երբ սկսել են շինարարությունը, քաղաքապետարանը խոչընդոտել է աշխատանքներին ու մտել դատարան՝ իրենց տված թույլտվությունը չեղյալ համարելու պահանջով: «Բայց ես 8 տարի գույքահարկ եմ վճարում, ո՞վ պետք է վերադարձնի այդ գումարները:
Իրենց կողմից բազմաթիվ նամակներ ունենք, թե մոտակա ժամանակներս կփոխհատուցեն և այլն, բայց ոչ մի գործնական քայլ չի արվում: Այս ընթացքում 4 քաղաքապետ է փոխվել, և ոչ ոք այդ խնդրի հետ կապված ոչինչ չէր արել: Բայց այսօրվա քաղաքային իշխանությունները որոշեցին դատական կարգով հասնել դրան: Սա իսկական խլոցի է»,- հավելեց գործարարը:
Նրա խոսքով՝ սկսած 2009 թվականից կառավարական ոչ մի պատվիրակություն չի այցելել իր ռեստորան, այն դեպքում, երբ մինչ այդ բոլոր պատվիրակությունները, պաշտոնական հյուրերը, պետական այրերի արտասահմանյան հյուրերը ճաշում և ընթրում էին միայն «Հին Էրիվանում»: «Հիմա որոշ պաշտոնյաներ, տեսնելով, որ ինձ հետ կապված խնդիրներ կան, իրենց վրա բիծ չգցելու համար այլևս իրենց հյուրերին մեզ մոտ չեն բերում: Որոշում է կայացվել այլևս ոչ մի պետական պատվիրակության մասնակցի չբերել մեզ մոտ»:
Նշենք, որ «Հին Էրիվանի» հետ կապված խնդրի պատճառով Մանվել Տեր-Առաքելյանը վերջերս 2 անգամ հանդիպեց վարչապետ Հովիկ Աբրահամյանի հետ: Երկրորդ հանդիպման ժամանակ գործարարը նրան է ներկայացրել խնդրի լուծման երկու ճանապարհ, բայց Հովիկ Աբրահամյանի արձագանքն ուշանում է: «Նա ասաց, որ կփորձի ինչ-որ ձևով օգտակար լինել, բայց մինչև էսօր ոչ մի ձայն չկա, ոչ մի տեղեկություն չկա: Ես համարում եմ, որ եթե իմ տված առաջարկներն ընդունելի լինեին վարչապետի համար, ապա այդ հակամարտությունն արդեն պետք է լուծված լիներ, և ես հիմա հերթական անգամ ստիպված չէի լինի դրան անդրադառնալ: Ես այլևս չեմ դիմի նրան, ինքն ամեն ինչից տեղյակ է, բայց շնորհակալ եմ, որ գոնե լսեց ինձ, ուրիշ ոչ մի բան»,- ասաց Մանվել Տեր-Առաքելյանը:
