«Տոկիոյի էլեկտրացանցեր» ընկերությունը երկուշաբթի օրը` մարտի 21-ին, հայտարարել է, որ վթարված «Ֆուկուսիմա-1» ԱԷԿ-ի բոլոր ռեակտորների միացումը էլեկտրացանցին ամբողջությամբ ավարտված է: Ավելի վաղ հայտնվում էր առաջին և երկրորդ էներգաբլոկների միացման մասին, իսկ երկուշաբթի օրն ավարտվել են երրորդի և չորրորդի էլեկտրամատակարարման վերականգնողական աշխատանքները:
Ընկերությունը սկսել է զբաղվել ռեակտորների սառեցման համակարգերի, ինչպես նաև այլ սարքավորումների թեսթավորման աշխատանքներով՝ նախքան վերագործարկումը: Այս մասին հաղորդել է Kyodo գործակալությունը։
Ճապոնիայի վարչապետ Նաոտո Կանը երկուշաբթի օրը հայտարարել է, որ ռեակտորի հարակից տարածքներում իրավիճակը կամաց-կամաց կարգավորվում է: Միևնույն ժամանակ Ճապոնիայի առողջապահության նախարարությունը անհանգստացած է ատոմակայանի շրջակայքի սննդամթերքում առկա ճառագայթման մակարդակից: Բժիշկներն այս իրավիճակը բնութագրում են որպես «շատ վտանգավոր»:
«Սա ավելի վտանգավոր է, քան որևէ մեկը կարող էր կանխատեսել աղետի առաջին փուլում: Մենք կարծում էինք, որ խնդիրներ կլինեն 20-30կմ շառավղով տարածքում»,- ասում է ՄԱԳԱՏԷ-ի խաղաղօվկիանոսյան տարածաշրջանի ներկայացուցիչ Փիթեր Կորդինգելին:
Ներկա պահին հայտնի է, որ ճառագայթման բարձր մակարդակ է գրանցվել Տոկիոյի և 5 այլ շրջանների խմելու ջրի մեջ: Ատոմակայանին հարակից տարածքներում ճառագայթման բարձր մակարդակ է գրանցվել բանջարեղենի և կաթի մեջ:
