«Բարգավաճ Հայաստան» խմբակցության պատգամավոր, Միավորված աշխատանքային կուսակցության նախագահ Գուրգեն Արսենյանը տարիներ առաջ հայտնի էր որպես Հայաստանի մեծահարուստ և իշխանամետ պաշտոնյաներից մեկը: Այսօր նա հայտնի է, որպես իշխանությունների գրեթե բոլոր գործողություններից դժգոհ և ամեն առիթով իշխանություններին քննադատող խոշոր սեփականատեր պատգամավոր:
Իսկ Գ. Արսենյանը բավականին մեծ կարողություն ունի: Նախ նշենք, որ նա քաղաքական դաշտ է մտել բավականին վաղուց՝ Հայաստանի անկախության առաջին տարիներից: Եվ այժմ որքան էլ մեզ համար զարմանալի է, նա 1990-1994 թվականներին անդամակցել է Հանրապետական կուսակցությանը: Պարզապես հիշեցնենք, որ այն ժամանակ ՀՀԿ-ն ուներ այլ ղեկավարներ: Իսկ 2002թ. Գ. Արսենյանը հիմնադրեց իր Միավորված աշխատանքային կուսակցությունը: 2000-2003թ. պատգամավոր է ընտրվել թիվ 29 ընտրատարածքից: Իսկ 2003թ. Ազգային ժողովի ընտրություններին արդեն նրա գլխավորած ՄԱԿ կուսակցությունն անցավ խորհրդարան, և նա գլխավորեց իր խմբակցությունը:
Ինչ վերաբերում է տնտեսական գործունեությանը, ապա 1990-ական թվականներին նա հիմնադրել է իր հայտնի «Արսօյլ» ընկերությունը, որը զբաղվել է նավթամթերքի բիզնեսով: Գ. Արսենյանի կենսագրության մեջ նշված է, որ 2007-2012թթ. զբաղվել է քաղաքական և ձեռնարկատիրական գործունեությամբ: Ու եթե ուշադիր լինենք, կտեսնենք, որ նրա կուսակցության հիմնադրումը, քաղաքական կարիերայի ու տնտեսական գործունեության առաջընթացը զուգակցվում են նախկին նախագահ Ռոբերտ Քոչարյանի պաշտոնավարման շրջանի հետ: Եվ ընդհանրապես, ՄԱԿ-ի հիմնադրումից կարճ ժամանակ անց քաղաքական դաշտում խոսակցություններ էին շրջանառվում, որ այդ կուսակցությունը ստեղծվել է Ռ. Քոչարյանի ազդեցությամբ: Սակայն այն չկայացավ, ու հետագայում նախկին նախագահը ստեղծեց «Բարգավաճ Հայաստան» կուսակցությունը: Այսպիսով, Գ. Արսենյանի թե՛ քաղաքական, թե՛ տնտեսական առաջընթացը կարելի է կապել Ռ. Քոչարյանի հետ: Հավանաբար հենց այդ նույն կապի շնորհիվ էլ 2012թ. խորհրդարանական ընտրություններին նա ընդգրկվեց ԲՀԿ-ի համամասնական ցուցակ և դարձավ այդ խմբակցության պատգամավոր:
Իսկ այս ընթացքում Գ. Արսենյանը հասցրել է կուտակել ահռելի ունեցվածք: Խորհրդարանական ընտրություններից առաջ Կենտրոնական ընտրական հանձնաժողով ներկայացրած հայտարարագրում նա բազմաթիվ անշարժ և շարժական գույք է գրանցել: Եվ այսպես` միայն Երևանում նա ունի 7 անշարժ գույք, որից երեքը՝ 610 քմ և 15 քմ տարածքով շինություն և 0,0917 հա հողակտոր Արաբկիրի 38 հասցեում: Մոտ 913 քմ տարածքով շինություն և 0,0906 հա հողակտոր Երևանի Քեռու փողոցում: Ինչպես նաև 235 քմ տարածքով շինություն և 0,0677 հա տարածքով հողակտոր Գյուլբենկյան փողոցում: Գ. Արսենյանը հողակտորներ և շինություններ ունի նաև Գյումրիում ու Արմավիրում: Օրինակ` Գյումրիում ունի 0,021283 հա հողամաս և մոտ 141 քմ շինություն: Արմավիրի մարզի Արտամետ համայնքում ունի 157 հեկտար, Տալվորիկում՝ 84 հեկտար, Նոր Կեսարիայում՝ 4 հեկտար և 7 հեկտար հողակտորներ: Այս անշարժ գույքի մեծ մասը պատգամավորն ամենայն հավանականությամբ ձեռք է բերել Ռ. Քոչարյանի պաշտոնավարման շրջանում, երբ վայելում էր նրա հովանավորությունը: Նա ևս մի անշարժ գույք՝ մոտ 190 քմ տարածքով շինություն ունի նաև Թբիլիսիում:
Գ. Արսենյանը հայտարարագրել է նաև 5 շարժական գույք, որից երեքը՝ 2003թ. թողարկված «Զեյներ CH-701STOL» ինքնաթիռներ են: Հայտարարագրել է նաև 2008թ. արտադրության «Լեքսուս LS600HL», «Ռենջ Ռովեր Super Chargeo» և «Տոյոտա Պրադո» ավտոմեքենաներ:
Ինչպես նշեցինք, Գ. Արսենյանին է պատկանում «Արսօյլ» ընկերությունը: Նրան են պատկանում նաև «Յունիքորն թրեյդ», «Յունիքորն գրուպ», «Յունիքորն փրինթ», «Յունիքորն թեքնոլոջի», «Յունիքորն քոնթրաքշն» գովազդային, տպագրական և այլ գործունեությամբ զբաղվող ընկերությունները, ինչպես նաև «Բիզնես Սթայլ» ընկերության 20 տոկոս բաժնեմասը, «Աննալուս» ընկերության 50 տոկոսը: Գ. Արսենյանին է պատկանում նաև Տաջիկստանում գործող «Գրանտ Տոբակո» ընկերության 85 տոկոսը:
Գ. Արսենյանը ունի նաև հսկայական ֆինանսական միջոցներ: Այս տարի Բարձրաստիճան պաշտոնյաների էթիկայի հանձնաժողովին ներկայացրած հայտարարագրի համաձայն` անցած տարվա վերջին նա ունեցել է 60 մլն 639 հազար դրամ, 2,7 մլն դոլար և 21,4 հազար եվրո գումար: Պակաս հարուստ չէ նաև նրա կինը՝ Էդիտա Ղարագյոզյանը, ով նույն հանձնաժողովին ներկայացրած հայտարարագրում նշել է, որ ունի 217 մլն դրամ, 248 հազար դոլար և 10 հազար եվրո:
Եվ ահա, Ռ. Քոչարյանի օրոք, որը նույնն է, թե անհավասար կամ գրեթե առանց մրցակցային ու արտոնյալ պայմաններում այսքան հարստություն դիզած, շարժական ու անշարժ գույք ձեռք բերած այս պաշտոնյան այսօր գործող իշխանություններին քննադատում է այն պատճառով, որ նրանք էլ իրենց հովանավորությունը վայելող գործարարների համար են նման պայմաններ ստեղծում: