«Իմ և «Բարգավաճ Հայաստան» կուսակցության միջև առկա խնդիրը տեղափոխվել է դատաիրավական համակարգ այս տարվա ապրիլ ամսին՝ մինչ այս մի քանի տեղեկատվական հարցումներ եմ ուղակել իրենց, որոնք անպատասխան են մնացել»,- «Առաջին լրատվական»-ի հետ զրույցում ասաց իրավաբան Նարեկ Ալոյանը, ով հայց է ներկայացրել ընդդեմ «Բարգավաճ Հայաստան» կուսակցության:
Նա նշեց, որ իր հարցումներն անպատասխան թողնելուց հետո գրությամբ տեղեկացրել է, որ պատրաստվում է դատական հայց ներկայացնել, բայց այն ևս անպատասխան է մնացել. «Հարցում ունեի՝ կապված ԲՀԿ տեղեկատվության ազատության ապահովման համար պատասխանատու անձի հետ՝ թե ով է այդ անձը հանդիսանում, բայց այդ տեղեկատվությունը մինչ օրս չի հաջողվել իմանալ»,- ասաց փաստաբանը:
Միևնույն ժամանակ, Նարեկ Ալոյանը ընդգծեց, որ կուսակցության հետ երբևէ որևէ խնդիր չի ունեցել, չկա թշնամանք, խնդիրը բացառապես իրավական հարթությունում է գտնվում: Նա նշեց նաև, որ սա արդեն երկրորդ դեպքն է, որ այս նույն պահանջով գործ է հարուցվում ընդդեմ «Բարգավաճ Հայաստան» կուսակցության, բայց ի տարբերություն առաջին դեպքի՝ այս անգամ լիարժեք ժխտում են իրենց մեղավորությունը:
Հարցին՝ դրական ակնկալիքներ ունի՞ դատական համակարգից, Նարեկ Ալոյանը պատասխանեց. «Կան որոշակի մտավախություններ, հարցը ներկայացվել է ապրիլ ամսին, իսկ առաջին դատական նիստը հինգ ամիս անց է տեղի ունենում: Մի կողմից՝ գուցե պայմանավորված է դատարանների ծանրաբեռնվածությամբ, բայց մյուս կողմից էլ՝ համապետական խնդիր է, եթե քաղաքացին իր իրավունքի վերականգնման համար դիմում է դատարան և ստիպված առաջին նիստին պետք է հինգ ամիս սպասի»:
Հետաքրքրվեցինք՝ արդյոք մտավախություն չունի՞, որ օլիգարխիկ այս կուսակցությունը իր հաշիվները նրա հետ այլ մեթոդներով կմաքրի. «Ո՛չ, մտավախություն չունեմ, ավելի վախենալու է ապրել վախենալով կամ ապրել խախտված իրավունքների մասին լռելով, քան անորոշ վախերի մեջ լինելով»:
Առավել մանրամասն՝ մեր տեսանյութում:
