Վարչապետ Տիգրան Սարգսյանը այսօր մասնակցել է տնտեսական մրցակցության պաշտպանության հանձնաժողովի 10-ամյակին նվիրված միջազգային համաժողովին և ներկայացրել, իր կարծիքով, այն 5 խոչընդոտները, որ կան Հայաստանում տնտեսական մրցակցության ճանապարհին:
Ըստ Տիգրան Սարգսյանի՝ առաջինը հարկային ու մաքսային վարչարարությունն է, երկրորդը՝ ձեռնարկությունների թափանցիկության խնդիրը, երրորդը՝ կոռուպցիան, չորրորդը՝ հասարակության հանդուրժողական վերաբերմունքը այդ երևույթների հանդեպ, իսկ հինգերորդն էլ Հայաստանի աշխարհաքաղաքական դիրքն է և աշխարհի հետ հաղորդակցության ճանապարհների սղությունը:
Կմնար միայն ծափահարել Տիգրան Սարգսյանին և խոնարհվել նրա դիտողունակության և ընկալունակության առաջ, եթե վարչապետը նաև համարձակություն ունենար խոսել ամենագլխավորի` պատճառների պատճառի մասին: Սակայն այդ մասին Տիգրան Սարգսյանը ինչպես լռել է, այդպես էլ լռում է, ու կլռի նաև առաջիկայում, քանի որ պատճառների պատճառի մասին խոսելը կնշանակի դուրս գալ Սերժ Սարգսյանի դեմ:
Բանն այն է, որ պատճառների պատճառը, որ Հայաստանում չի արձանագրվում տնտեսական մրցակցություն, իշխանության քաղաքական կամքի բացակայությունն է: Այդ «կամքը» արտահայտվում է միայն դատարկ ելույթներով, խոսքերով, որոնք գործի չեն վերածվում ոչ մի կերպ: Հայաստանում տնտեսական մրցակցություն չկա, որովհետև չկա քաղաքական մրցակցություն, և իշխանությունը պատկանում է մարդկանց մի խմբի՝ ի հեճուկս հասարակության կամքի:
Այդ խումբը, ներկայումս՝ Սերժ Սարգսյանի գլխավորությամբ, տիրել է քաղաքական լծակներին, նույնականացել բիզնես լծակների հետ և հաստատել քաղաքական ու տնտեսական մենաշնորհ: Մնացյալ պատճառները այդ գլխավոր պատճառի հետևանքներն են, հետևաբար, դրանք չլինել կարող են միայն այն դեպքում, եթե չլինի գլխավոր պատճառը` քաղաքական կամքի բացակայությունը:
Այդ մասին է պետք խոսել, այստեղ է «թաղված շան գլուխը»: Եվ պետք չէ հասարակության գլուխը լվանալ դեմքի խելոք արտահայտությամբ արվող դատողություններով:
Ապահովեք երկրում քաղաքական մրցակցություն, ունեցեք իշխանության ձևավորման մեխանիզմը հասարակության կամքի վրա կառուցելու համարձակություն, և կտեսնեք, թե հաշված շաբաթների կամ ամիսների ընթացքում ինչպես է կտրուկ փոխվում իրավիճակն, ու ստացվում բոլորովին այլ որակ, կտեսնեք, թե ինչպես են ինքնաբերաբար վերանում այդ 5 պատճառները, որոնք ներկայումս հռչակվում են որպես տնտեսական մրցակցության խոչընդոտ:
Լուսանկարը` Գագիկ Շամշյանի
