Ազգային ժողովի ՀՀԿ-ական պատգամավոր Նաիրա Կարապետյանի կարծիքով՝ էլեկտրաէներգիայի սակագնի բարձրացման հարցում հնարավոր է՝ փոքր-ինչ շտապողականություն է եղել:
«Առաջին լրատվական»-ի հետ զրույցում Կարապետյանը նշեց, որ էլեկտրաէներգիայի սակագնի վերանայման հարցով լսումներին ինքը մասնակցել է, իրեն հուզող հարցերին անդրադարձել: «Բացասաբար եմ վերաբերվում էլեկտրաէներգիայի թանկացմանը, մանավանդ չորս դրամը, որ նախատեսվում է, բավական մեծ գումար է: Պետք է հաշվի առնենք, որ վերջերս ևս ութ դրամով թանկացավ: Այս առումով մեր երիտասարդների և քաղաքացիական հասարակության բողոքը լրիվ հիմնավորված եմ համարում, սակայն կարծում եմ, որ գտնվել է այս իրավիճակային լուծումը: Անձամբ իմ հարցապնդումներին գոնե ներկայացվեց, որ սա երկարատև չի լինի, և հետագայում գուցե լինի գնի նվազեցում»,- ասաց նա:
Կարապետյանը, սակայն, կարծում է՝ գինը բարձրացնելուց առաջ պետք էր մի քիչ ավելի երկար մտածել, այլընտրանքային միջոցներ գտնել գուցե: Պատգամավորը նշում է՝ հնարավոր է՝ գտնեին համապատասխան ռեսուրսներ, գնային զոհողության, նույն Սևանից կես մետր կամ մի մետր ջուր բաց թողնեին:
«Ճիշտ է, դա էլ չի կարելի, բայց համեմատական կարգով գուցե մենք այս տարի էդ զոհողությանը գնայինք, փակեինք այդ պարտքը, որ գոյացել է, և չթողնեինք այդ բեռը քաղաքացիների ուսերին, բայց ցավով եմ նշում, որ այս պահին իրոք իրավիճակային լուծումը դա է, ինչքան էլ մեր բոլորի համար, նաև իմ և ընտանիքիս, լինելու է լրացուցիչ սոցիալական բեռ»,- ասաց նա: