«Առաջին լրատվական»-ի զրուցակիցն է Պահպանողական կուսակցության նախագահ Միքայել Հայրապետյանը:
– Ընդդիմության վերջին հանրահավաքը նշանավորվեց նրանով, որ ժողովուրդը մտավ Ազատության հրապարակ: Ըստ Ձեզ` դա բավարա՞ր պայման է, որպեսզի հասարակությունը դառնա ավելի ակտիվ և դիմի կազմակերպված գործողությունների:
–Այո՛:
–Ըստ Ձեզ` ճի՞շտ վարվեցին ընդդիմության առաջնորդները, երբ հերթական մարդաշատ հանրահավաքից հետո, որտեղ վանկարկում էին` «հիմա՜, հիմա՜», ժողովրդին հերթական անգամ տուն ուղարկեցին:
–Սա պետք է հարցնել ընդդիմության առաջնորդներին:
–Նախորդ հանրահավաքում Լևոն Տեր–Պետրոսյանը հայտարարել էր, որ ստեղծվել է ինքնակառավարման ֆորում. Ձեր տպավորությամբ, մեր հասարակության մեջ արդեն ձևավորվե՞լ է այդ ֆորումը:
–Դեռ ո՛չ:
–Լևոն Տեր–Պետրոսյանը մարտի 17-ի հանրահավաքում հայտարարեց, որ իշխանությունը ստիպված է լինելու ընդունել հասարակության թելադրած խաղի կանոնները. այն է` խոսել ոչ թե բիրտ ուժի, այլ հավասար քաղաքական գործընկերոջ դիրքերից: Իրատեսակա՞ն եք համարում, որ իշխանությունը կգնա այդ քայլին:
–Լևոն Տեր–Պետրոսյանին եմ իրատես և իմաստուն համարում:
–«Ժառանգության» ղեկավար Րաֆֆի Հովհաննիսյանն օրեր առաջ հայտարարել է հացադուլ: Փոփոխությունների կարո՞ղ է հանգեցնել այդ ակցիան, և որքանո՞վ է այդ քայլն արդյունավետ:
–Դժբախտաբար, ներկա դասավորության պարագայում հազիվ թե որևէ փոփոխության հանգեցնի, եթե հաշվի չառնենք արդեն իսկ առաջացրածը. նա առաջին քաղաքական լիդերն էր, որ 2008թ. մարտի 1-ից հետո քաղաքական ակցիա անցկացրեց գերեվարված Ազատության հրապարակում, որը խոնարհումով ողջունում եմ:
–Ակնկալու՞մ եք, որ տեղի կունենան արտահերթ ընտրություններ, և ո՞ր պարագայում:
–Ոչինչ չեմ ակնկալում: Կկամենայի` լինեին նախագահի ընտրություններ, որպեսզի վերջապես ունենայինք ընտրյալ նախագահ, որը կկազմակերպեր խորհրդարանի ազատ և արդար ընտրություններ, ինչը գործող ինքնահռչակի պարագայում գրեթե բացառվում է: Հայաստանն այսօր այնպիսի գաղութացված վիճակում է, որ ինքնուրույնաբար չի կարող վճռել` անցակացնե՞լ , թե՞ չանցկացնել արտահերթ որևէ ընտրություն: Արտահերթ կլինի միայն այն պարագայում, երբ այս օտարերկրյա գործակալական իշխանությունների տերերը հանձնարարեն նման բան: Անշուշտ, չեմ բացառում համաժողովրդական ընդվզման պարագան:
–2008թ. մարտի 1-ի դեպքերից մի քանի ամիս անց Դուք հայտարարեցիք, որ իշխանությունները չեն հանդգնի ժողովրդին ևս մեկ անգամ տանել մարտի 1-ի միջով: Կարծում եք, որ եթե հիմա բարձրանա համաժողովրդական ընդվզման ալիք, մարտի 1-ը չի՞ կրկնվի:
-2008-2010 թվականներին, իրոք, իշխանությունը չէր հանդգնի մի նոր Մարտի 1 սարքել: Չի բացառվում, որ հիմա էլ չի հանդգնի. մանավանդ որ հուսահատ, վերջին կռվի խնդիր չկա. չկա նաև արյուներախը: Սակայն հաշվի առնելով մեր շուրջը զարգացող աշխարհաքաղաքական իրադարձությունները` միարժեքորեն բացառել հնարավոր չէ: