Ժամանակակից ազգային քաղաքական կուսակցությունների անցումային մոդելները ԵՄ քաղաքական ընտանիքներին անդամակցության նախաշեմին թեմայով աշխատաժողովին բացման խոսքով հանդես եկավ նաև ՀՀ կրթության և գիտության նախարար Արմեն Աշոտյանը: Նա նշեց, որ իր ներկայությունը այս աշխատաժողովին պատահական չէ, քանզի Հայաստանի եվրաինտեգրման հաջողությունը կախված է ոչ միայն քաղաքական, տնտեսական ոլորտներից, այլ նաև կրթական համակարգից:
«ԵՄ-ն մեզ համար լոկ քաղաքական միավոր չէ, այլ արժեքների վրա խարսխված քաղաքակրթական հանրույթ, որի արժեքները հարիր են նաև հայ հասարակությանը: Իսկ այդ արժեքների տարածման գործում բացառիկ է հենց կրթական համակարգի դերը: Այդ արժեքների տրանսլյացիան, փոխանցումը և տարածումը ապահովում է կրթական համակարգը»,- նշեց Աշոտյանը և հավելեց, որ այն կուսակցությունը, որն ինքը ներկայացնում է, նույնպես հայտնել է եվրոպական քաղաքական ընտանիքին ինտեգրվելու ցանկությունը և քաղաքական որոշումը:
Աշոտյանի գնահատմամբ, որքան ակտիվ են հայաստանյան կուսակցությունները համագործակցում իրենց գաղափարակից եվրոպական կուսակցություններին, այնքան մեծ հնարավորություն կա Հայաստանը հավուր պատշաճի ներկայացնելու Եվրոպայում և մեր ՀՀ արտաքին քաղաքական շահերը ներկայացված կլինեն հարիր կերպով:
ԿԳ նախարարը նաև նշեց, որ դրա վառ օրինակն է ՀՅԴ-ն, որն այս պահին Հայաստանի քաղաքական դաշտում միջազգային և եվրոպական քաղաքական կառույցներին ամենաինտեգրված քաղաքական ուժերից մեկն է, և այդ կապը օգտագործում են ոչ միայն կուսակցական նպատակների համար, այլ նաև պետության արտաքին քաղաքական շահերի ներկայացման առումով: