Անձնագրային և վիզաների վարչության Արաբկիրի անձնագրային բաժանմունքում քաղաքացիների «հերթ» է գոյացել: Մարդիկ անգամ ընդմիջման ժամին չեն հեռանում բաժանմունքի դիմացից, ասում են՝ գուցե գնան-հետո գան, ու այդպես էլ իրենց հերթը չհասնի:
Այս բաժանմունքի դիմաց սպասողները հիմնականում իրենց ժամկետը լրացած անձնագրերը փոխելու համար են եկել: Նույնականացման քարտի պետական տուրքը 3000 դրամ է, իսկ կենսաչափական տվյալներով անձնագրերի պետտուրքը՝ 25 հազար դրամ։ Նույնականացման քարտերը Հայաստանի տարածքում հավասար են անձնագրի, իսկ երկրից մեկնելու համար առանց կենսաչափական տվյալներ պարունակող անձնագրերի Հայաստանի քաղաքացիները չեն կարող: Քաղաքացիները վստահեցնում են. եթե ցանկանում են իրենց փաստաթղթերն ավելի շուտ ստանալ, հավելյալ գումար են պահանջում. մեկ աշխատանքային օրում ստանալու համար՝ 20 հազար դրամ, երեք աշխատանքային օրում՝ 10 հազար դրամ, իսկ հինգ աշխատանքային օրում ստանալու համար՝ 5 հազար դրամ:
Անձնագրային և վիզաների վարչության Արաբկիրի անձնագրային բաժանմունքի առաջատար մասնագետը «Առաջին լրատվական»-ին վստահեցրեց. ամռանը գրեթե միշտ շատ մարդիկ են գալիս, ցանկանում են հանգստի մեկնել, ուստի պետք է վիզա ունենան: Սպասող մարդկանց մեծամասնությունը նոր անձնագիր ստանալու համար են դիմում:
Բաժանմունքում նաև վստահեցնում էին, որ հերթը թվացյալ է, քանի որ բաժանմունքի դիմաց կանգնած մարդիկ այլ շրջաններից են. բաժամնունքը կանգառի մոտ է, ավտոբուսները գնում-գալիս են:
«Առաջին լրատվական»-ը նաև հետաքրքրվեց՝ ինչու են քաղաքացիներից հավելյալ գումարներ պահանջում: Բաժանմունքում վստահեցրին, որ հավելյալ գումարներ տալը օրենքով՝ կառավարության համապատասխան որոշմամբ է կարգավորվում: Իսկ քաղաքացիները դժգոհում են. Եթե հնարավոր է փաստաթղթերը արագ ձևակերպել, ինչո՞ւ են իրենցից գումար շորթելը օրինականացնում:
Բացի դրանից՝ նոր անձնագիր ձեռք բերողների շարքում մեծ մասամբ թոշակառուներ են, որոնք գումար չունեն հավելյալ վճարելու համար և հետագայում խնդիրներ են ունենում փոստային բաժանմունքում ժամկետը լրացած անձագրով թոշակ ստանալու հարցում. նրանց ուղղակի գումարը չի տրվում, և բոլոր դռները կրկին տանում են անձնագրային բաժանմունքներ: