Վարչապետ Հովիկ Աբրահամյանի որոշմամբ Սփյուռքի փոխնախարար Վահե Ջիլավյանն ազատվել է պաշտոնից: Թեև նշվում է, որ նա ազատվել է իր դիմումի համաձայն, սակայն նախարարության աշխատակիցները բոլորովին այլ պատճառ են նշում: Իսկ այդ պատճառը նախարար Հրանուշ Հակոբյանի հետ տարաձայնություններն են:
Առհասարակ, աշխատակիցների խոսքով՝ այդ տիկնոջ հետ լեզու գտնելը շատ դժվար է, և ոչ բոլոր աշխատակիցներին է հաջողվում հարաբերություններ պահել նախարարի հետ: Նա ընդգծված կոշտ վերաբերմունք, վարվելաձև ունի հատկապես իր տղամարդ աշխատակիցների հետ, ինչն էլ հանգեցնում է նրան, որ մի պահի այլևս նրանք չեն դիմանում և ազատման դիմում են գրում:
Բացի դրանից՝ Վահե Ջելավյանը համարվում էր Տիգրան Սարգսյանի կադրերից, ինչը Հովիկ Աբրահամյանի կառավարության հետ անհամատեղելի է: Նշենք նաև, որ Ջիլավյանը ժամանակին՝ 2012 թվականին, փոխնախարար էր աշխատում կապի ու տրանսպորտի նախարարությունում, սակայն էլի նույն պատճառաբանությամբ ազատվեց աշխատանքից և տեղափոխվեց Սփյուռքի նախարարություն:
Վահե Ջիլավյանի հետ կապ հաստատել մեզ չհաջողվեց:
