Քաղաքացիական ակտիվիստ Վիլեն Գաբրիելյանի (Նավակ Ճոճող) կարծիքով՝ պետք է բոլոր անձնական ու գաղափարական տարաձայնությունները դնել մի կողմ, հավաքվել, բոլոր լոկալ խնդիրները դնել մի հարթակի վրա ու պայքարել ապօրինի իշխանությունների դեմ:
«Շատերին կարող է թվալ, թե ես կոչ եմ անում համախմբվել մի կառույցի մեջ, բայց բացարձակ նման բան չկա: Ինձ համար կառույցը Ազատության հրապարակն է, Մյասնիկյանի հրապարակը, ես չեմ ուզում ստորագրել մի թղթի տակ, պարտավորություններ ստանձնել, և հետո հանկարծ այդ կառուցին դուր չեկող ինչ-որ բան սխալ անեմ, ու ինձ կշտամբեն: Չեմ ուզում ինձ ինչ-որ թղթով սահմանափակել»,- ասաց նա:
Վիլեն Գաբրիելյանի դիտարկմամբ՝ պայքարը համակարգի դեմ է, իսկ այս պահին համակարգի մեջ մտնում է թե՛ իշխանությունը, թե՛ ընդդիմությունը:
«Երբ դու գալիս ես հրապարակ, գալիս ես կոնկրետ նպատակների համար՝ այն ենթագիտակցությամբ, որ գալիս ես գործողություն անելու, ոչ թե առաջնորդի անունը վանկարկելու: Մեզ մոտ այսպես է՝ երբ գալիս է գործելու պահը, մեծ մասամբ առաջնորդները խուսափում են իրենց վրա պատասխանատվություն վերցնել»,- ընդգծեց մեր զրուցակիցը:
Նրա խոսքով՝ բոլոր խնդիրները, անգամ լոկալ խնդիրները, գլոբալ բնույթի են. «Նույն Աֆրիկյանների խնդրում ամեն ինչ կա՝ բեսպրեդել, ամենաթողություն, ոստիկանների բռնություն, Սերժի ոչ լեգիտիմություն: Մի պահ եղավ, որ ասացին՝ լոկալ է, հատուկ բերեցինք՝ ՀՀԿ դրոշ կպցրինք: Լսել եմ, շատ անգամ են ասում՝ Աֆրիկյաններն ինչ-որ հարցից շեղում է, այդ մարդկանց հարցնում եմ՝ ո՞ր հարցից, ինչ-որ բա՞ն է կատարվում այս երկրում, եթե այո, ես կասեմ՝ սխալ ուղղությամբ եմ շարժվում»:
Ակտիվիստի դիտարկմամբ՝ այս պահին ճիշտը քաղաքական դաշտը մերժելն է. «Անընդհատ նույն դիսկուրսի մեջ ենք՝ առաջին նախագահ, երկրորդ- երրորդը նույնիսկ չակերտավոր նախագահ են… այդ դիսկուրսն է շեղում քաղաքացիներին՝ միավորվելու այլ խնդիրների շուրջ»:
Նրա խոսքով՝ մինչև 2017-18թթ. հնարավոր են արտահերթ զարգացումներ, հնարավոր է՝ դրանք նույնիսկ քառյակը ստեղծի՝ խոստացված թեժ աշնանը. «Բայց դա չի լինի այն, ինչ ես եմ ուզում. ես ուզում եմ՝ ով թալանել է, մարդ է սպանել, օրենք է խախտել՝ պատժվի: ՀՀ քաղաքացիները կգնան այն մարդու հետևից, ով այս ամենը բարձրացնի: Պետք է վերցնել ժողովրդից թալանածը ու վերադարձնել ժողովրդին»:
Հարցազրույցն ամբողջությամբ՝ մեր տեսանյութում:
