Էլեկտրաէներգիայի սակագնի բարձրացման այլընտրանքը հովհարային անջատումներն են: Այս մասին այսօր ՀՀԿ ԳՄ նիստից հետո լրագրողների հետ զրույցում տեղեկացրեց ՀՀԿ մամլո խոսնակ Էդուարդ Շարմազանովը: Նա տեղեկացրեց, որ նիստի ընթացքում քննարկվել են ներկուսակցական հարցեր, և ՀՀԿ առաջնորդը ներկայացրել է Լատինական Ամերիկա իր առաջիկա այցելության մանրամասները:
Անդրադառնալով Ֆրանսիայի նախագահ Ֆրանսուա Օլանդի հայտարարությանը՝ Է. Շարմազանովն ասաց, որ հայկական կողմերը մշտապես բանակցային գործընթացի կողմնակիցն են: «Մենք խնդրի խաղաղ կարգավորման կողմնակից ենք, և այլ կարծիք լինել չի կարող: Միևնույն ժամանակ պետք է գիտակցենք, որ խաղաղ կարգավորմանն այլընտրանք չկա։ Ապակառուցողական է իրեն դրսևորում Ադրբեջանը, և միջազգային կառույցների գնահատականները ոչ թե ընդհանուր պետք է լինեն, այլ հստակ դատապարտեն այն կողմին, որը թե խոսքով, թե գործով հակահայկականություն ու ֆաշիզմ է քարոզում»,- ասաց Շարմազանովը:
Հարցին, թե Տիգրան Սարգսյանի դեմ սկսված ստորագրահավաքը կարո՞ղ է անդրադառնալ ՀՀ նախագահ Սերժ Սարգսյանի՝ Տիգրան Սարգսյանին դեսպանի պաշտոնում նշանակելու որոշման վրա, նա պատասխանեց, որ նշանակվել է Տիգրան Սարգսյանը դեսպանի պաշտոնում, ինքը ՀՀ նախագահի որոշումները չի մեկնաբանում: «Կարծում եմ, որ նա կարող է լավագույնս աջակցել հայ-ամերիկյան հարաբերությունների խորացմանը»,- ասաց նա:
Անդրադառնալով էլեկտրաէներգիայի սակագնի բարձրացմանը՝ նա ասաց, որ ՀՀ իշխանությունները մազոխիստ չեն, որ չպատճառաբանված սակագին բարձրացնեն: Նա նշեց, թե ընդունում է, որ ցանկացած թանկացում ծանր բեռ է հանրության համար: Սակայն եթե հանրությունն ուզում է ունենալ կայուն էլեկտրամատակարարում, նրա խոսքերով, այդ քայլին պետք է գնալ, դրան այլընտրանքը հովհարային անջատումներն են: «Համապատասխան մասնագետները հաշվարկել են, որ թանկացումը 800-1000 դրամով է ազդելու, ուստի նպաստառու ընտանիքների նպաստն այդքան է ավելացել: Խոսեք նաև, որ ավելանում են պետական ծառայողների աշխատավարձերը, նավթամթերքի գներն իջել են, դրանից ևս խոսեք: Ցանկացած թանկացում հաճելի չէ, պարզապես մենք պետք է գիտակցենք՝ կա՞ այլընտարնք, թե՞ ոչ: Մեր ուշքը գնո՞ւմ է ժողովրդի էլեկտրաէներգիան բարձրացնելու համար»,- ասաց նա:
Առաջարկում ենք մանրամասներին ծանոթանալ տեսանյութի միջոցով: