Լիբանանում բնակվող գործարար Թորոս Սեֆիլյանը, ով ոսկերչական արտադրամաս ունի` ոսկին մշակում, ձուլում և վաճառում է, «Հայկական վերածնունդ» քաղաքացիական շարժմանը անդամագրվելով` ցանկանում է իր ներդրումը բերել Հայաստանի ներքին խնդիրների լուծմանը:
«Առաջին լրատվական»-ի հետ զրույցում Սեֆիլյանը նշեց, որ ներքին, ազգային հարցերով զբաղվելու գիտակցությունն իրեն ստիպել է անգամ իր անձնական գործերը թողնել մի կողմ: «Արդեն ամիսուկես Երևանում եմ, այսպես էլ շարունակելու ենք, ժամանակ ենք տրամադրելու, մինչև երկիրը ցանկալիին հասցնենք»,- ասաց նա:
Հայաստան վերադառնալու պայմանը մի շարք հարցերում հստակությունն է: Սեֆիլյանի խոսքով` շատերն են այդպես մտածում, երբ պահը գա, ընտանիքները վերցնելով` կգան, բայց կարծում է` այսօր պետք չէ չմտածված քայլեր անել` գալ երկիր` չիմանալով ինչ պիտի անեն այստեղ: «Քանի որ իշխանությունների մոտ չկա գիտակցումը, որ արտերկրում բնակվող ընտանիքին վերադառնալուց հետո աշխատանքով ապահովեն կամ այլ խնդիրներ լուծեն, դրա համար ժամանակը չէ: Կարծում եմ` նախ լավ մշակված ներգաղթի ծրագիր պետք է կազմակերպվի, դրանից հետո նվազագույնը հինգ տարում կարևոր հարցեր լուծած կլինենք: Հսկայական թվով մարդիկ վերջին տարիներին երկրից դուրս են եկել, բայց մինչև ե՞րբ: Արտագաղթը սարսափելի բան է»,- ասաց նա:
Հետաքրքրվեցինք` կառավարության փոփոխությունը հուսադրող չէ՞` հաշվի առնելով վարչապետի խոստումները` գործարարներին հնարավորինս աջակցելու մասին, Սեֆիլյանը բացասական պատասխան տվեց: Նա նշեց, թե կառավարությունից, բնական է, պիտի շարունակվեն նույն խոստումները հնչել: «Իրենք պիտի նույն խոսքերն ասեն: Մեր ժողովուրդը մինչ օրս ինչ խոստումներ լսել է, կրկնակին պիտի լսի, բայց ես ծրագրեր, հիմքեր չեմ տեսնում: Նման բան ասող Կառավարությունը նախ պետք է ինքը ծրագրեր մշակած լիներ, ստեղծած լիներ արտադրամասեր, գործարաններ, որպեսզի ժողովուրդը, այստեղ գալով, նախ աշխատատեղ գտներ: Արտերկրում ապրող յուրաքանչյուր հայ որ գալիս է, տեսնում է միայն, որ Երևանում կան ռեստորաններ, փաբեր, մինիմարկետներ կամ սուպերմարկետներ ենք տեսնում, արհեստավորների գրեթե չեմ տեսնում, շատ քիչ կան, բայց մեր գիտակցության մեջ այլ է: Նախ` պիտի նման տեղեր ստեղծեն: Մարդը, երբ գործ ունի և աշխատում է, արտագաղթելու մտքեր չի ունենա, բայց մինչև ե՞րբ կարող է սպասել, որ իրեն դրսից փող ուղարկեն, որ կարողանա ապրել»,- ասաց նա:
Սեֆիլյանը նշեց, թե ինքը նոր չէ որ Հայաստան է գալիս. 2000 թվից գալիս է, այն էլ` երկար ժամանակով, սակայն տեսնում է` ոչինչ չի փոխվում, դեպի անդունդ ենք գնում, բայց` մինչև ե՞րբ: Նա վստահեցնում է` երբեք վախենալու պատճառներ չի ունեցել, ընկերների հետ ծրագրեր են մտածել` ինչպես անեն, որ մարդիկ այստեղից չգնան, բայց գիտի` առաջին հերթին այստեղ թույլ չեն տալու, որ իրենք բիզնես դնեն, պիտի փորձեն արգելքներ դնել. դա իրենց համար հստակ է: Եղբոր` ազատամարտիկ Ժիրայր Սեֆիլյանի գործունեությունը նա բարձր է գնահատում, նշում է, որ եղբայրը դեռ փոքր հասակից ունեցել է այդ գիտակցությունը, կարողացել է որոշել և գալ, հասնել այստեղ, մասնակցել ազատամարտին, սակայն կարծում է` մինչ օրս չկարողացանք պետք եղած ձևով գնահատել այդպիսի մարդկանց:
«Այսինքն` պատմությունը մեզ սովորեցնում է` ով զոհվում է, հերոս է դառնում, բայց ամենից գեղեցիկն այն է, որ եթե իսկապես կան արժանավոր մարդիկ` կենդանության օրոք նրանց գնահատել իմանանք: Մեր ժողովրդի մոտ սա պակասում է»,- ասաց նա` հավելելով, որ եղբորը երբևէ չի համոզել` հետ կանգնել իր բռնած ուղուց և վերադառնալ: Նրա խոսքով` դա ժամանակի` անցյալի մեջ թաղված մի խնդիր է եղել, բայց վերջին 20 տարում նման խնդիրներ չեն եղել. ինչ որ անում է եղբայրը, ինքը նրա կողքին եմ, ինչով կարողանում, օգնում է նրան, միասին աշխատում են:
Սեֆիլյանի խոսքով` հուսադրող է Հայաստանում քաղաքացիական շարժումների, հատկապես` երիտասարդների ակտիվացումն ու իրենց իրավունքներին տեր կանգնելը: Նա վստահ է` առողջ երիտասարդություն կա, ով կարող է նպատակին հասնել: «Իմ տարիքի և ավելի մեծ մարդկանց մեջ անհավատություն կա` պետք եղած ձևով երիտասարդին չեն հավատում, դա ինձ համար ամենասոսկալի բանն է: Եթե ես տեսնեմ, որ մի երիտասարդ մի 20 – 30 տոկոսանոց գեղեցիկ բան է ասում, ես մնացածը կամբողջացնեմ, որ հասցնեմ առավելագույնի: Երբ երիտասարդ էի, նույնը պահանջում էի մեր տարեցներից, հիմա պահն եկել է. եթե ես ժամանակին ուզում էի` այդպես լինի, ինչու երբ պահը եկել է, ինքս չանեմ: Կարծում եմ` մեր գալիք փրկությունն իրենցով պիտի լինի, իսկ մեր ներկայությունը պիտի լինի` որոշ հարցերում իրենց առաջնորդելով, որոշ հարցերում իրենց կողքին լինելով»,- ասաց նա: