«Արցախը Հայաստանն է և վերջ» կոմիտեի անդամ, Արցախի ԱԺ անկախ պատգամավոր Վահան Բադասյանի կարծիքով՝ ոչ ոք իրավունք չունի առևտուր անել Արցախի հարցով, և Հայաստանը չպետք է անդամագրվի այնպիսի միությանը, որը կարող է Հայաստանի և Արցախի միջև անցակետ դնելու հարց առաջացնել կամ խաթարել Արցախի անվտանգությունը:
«Արցախի վրա ոչ ոք իրավունք չունի առևտուր անել, Արցախը վաղուց Հայաստանն է, և վերջ: Մենք մեր ազգային էներգիան, ջանքերը, արյունը դրա համար ենք թափել 88 թվականին:
Հիմա մենք կորցրել ենք մեր ինքնիշխանությունը․ ճիշտ է՝ միջազգային հանրությունը չի ճանաչում, բայց Արցախը Հայաստանն է»,- ասաց նա:
Վահան Բադասյանի դիտարկմամբ՝ եթե իշխանությունները խաղաղ երկխոսությամբ չեն պատկերացնում հարցի լրջությունը, ապա պետք է հրապարակային պայքարել․ «Բանը հասել է հրապարակային պայքարի՝ հանրահավաքների: Հիմա հարցն այն է, որ այլևս երկխոսություններ պետք չեն, հարցը հասել է ազգային հանրահավաքային ալիքի»:
Հարցին, թե հանրահավաքներ նախատեսում են անել Արցախո՞ւմ, թե՞ Հայաստանում, Վահան Բադասյանն ասաց․ «Միահամուռ ուժերով դա պետք է լինի: Հիմա Հայաստանում շատ խնդիրներ կան, օրինակ՝ էլեկտրաէներգիայի թանկացումը: Առհասարակ՝ ռուսական կայսրության ներկայացուցիչները կեղեքում են Հայաստանը, իսկ ՀՀ իշխանությունները հլու-հնազանդ ենթարկվում են նրանց:
Տեսա՞ք, թե էլեկտրաէներգիայի թանկացման դեմ ուղղված բողոքի ալիքը ինչի հանգեցրեց Երևանում, ինչ ավարտ ունեցավ… Ըստ իս՝ ողբերգալի էր: Մի խումբ մարդիկ դուրս են եկել խաղաղ ցույցի, բայց նրանց նկատմամբ բռնություն են գործադրել, ծեծել են: Մենք պետք է այդ ամենը ոչ թե մի քանի հոգով կազմակերպենք, այլ ազգովի դուրս գանք: Միակ հաղթանակը ազգային հավաքական ուժի մեջ է»,- ասաց պատգամավորը:
Հետաքրքվեցինք նաև, թե իրե՞նք էլ են պատրաստվում քառյակի նման այդ խնդիրների դեմ պայքարել աշնանը: «Հայաստանում կխնդրեի մոռանալ այդ չորս ուժերին, խնդրում ու պահանջում եմ մոռանալ նրանց մասին, նրանք բոլորը մեկը մյուսի տարբերությամբ առևտրականներ են: Նրանցից ոչ մեկը ռեալ ընդդիմադիր կեղցվածք չունի: Եթե նրանք են ուզոմ հանրահավաքներ անել, ապա նրանք շեղում են հասարակության ուշադրությանը: Իհարկե, փոքրաթիվ, բայց Հայաստանում ընդդիմություն գոյություն ունի, նրանք այսօր խորհրդարանում չեն, արտախորհրդարանական ուժերն են: Նրանցից էլ, իհարկե, ոչ բոլորն են ընդդիմադիր»,-եզրափակեց Վահան Բադասյանը: