«Օրինաց երկիր» կուսակցությունը և Ագրարային համալսարանն այդպես էլ չեն կարողանում հարթել գրասենյակի և համալսարանի հարևանությամբ գտնվող հողատարածքի պատճառով առաջացած վեճը: Վեճն արդեն իրավական բնույթ է ստացել և գտնվում է ոստիկանության վարույթում:
Հիշեցնենք, որ նշված տարածքում գտնվում էր ՕԵԿ-ին պատկանող դահլիճ, որը նրանք հիմա նորոգում են վերջերս գնած «Երևան» TV-ի համար նոր ստուդիա կառուցելու նպատակով, իսկ համալսարանի ղեկավարությունը պնդում է, որ տարածքն իրենն է, և իրենք պատրաստվում են այնտեղ համալսարանին կից լաբորատորիա կառուցել: ՕԵԿ պատգամավոր Հովհաննես Մարգարյանը պնդում է, որ իրենք ունեն տարածքը շահագործելու համապատասխան թույլտվություն և որոշում: Տարածքը 2008 թվականին անհատույց և անժամկետ տնօրինման իրավունքով հանձնվել է իրենց: Իսկ Ագրարային համալսարանի ընդհանուր գծով պրոռեկտոր Պարույր Էֆենդյանը իր հերթին է պնդում, որ այդ տարածքը իրենց է հանձնված: Այն պետական գրանցում ունի, առկա է կառավարության որոշում, որտեղ համալսարանին տրված գույքի ցանկում է նաև այդ տարածքը:
Եվ մինչ իրավապահները կփորձեն պարզել՝ ով է ճիշտ և իրականում ում է պատկանում տարածքը, ՕԵԿ ներկայացուցիչներն այսօր սկսել են ավարտին հասցնել տարածքի քանդման աշխատանքները, սակայն Ագրարային համալսարանի ղեկավարությունը վրա էր հասել՝ թույլ չտալով քանդել տարածքը, և արդյունքում իսկական իրարանցում էր առաջացել: Հովհաննես Մարգարյանի պնդմամբ, գործը քննող քննիչը իրենց թույլատրել է քանդման աշխատանքներ իրականացնել, բայց ոչ կառուցապատման, մինչև չլինի քաղաքապետարանի համապատասխան որոշումը: Այսօրվա վեճի արդյունքում կողմերն այդպես էլ կոմպրոմիսի չեկան, բայց որոշեցին սպասել, մինչև գործը կգնա դատարան, և ինչ որոշի դատարանը, այդպես էլ կվարվեն:
ՕԵԿ խոսնակ Արթուր Միսակյանը, սակայն, Ագրարային համալսարանի բարձրացրած այս աղմուկի և, առհասարակ, տարածքը իրենցից խլելու որոշման մեջ քաղաքական ենթատեքստ է տեսնում: Նրա խոսքով՝ իրենք արդեն 6-7 տարի է՝ շահագործում են նշված տարածքը, և ոչ մի անգամ ոչ մի խնդիր չի առաջացել, բայց երբ ՕԵԿ-ի քաղաքական կուրսի մեջ փոփոխություն եղավ, կուսակցությունը հայտարարեց, որ դառնում է ընդդիմություն, բարձրացավ այս աղմուկը: «Ես ոչ մի ակնարկ չեմ անում, բայց մեկնաբանությունները թողնում եմ ձեզ»,- «Առաջին լրատվական»-ի հետ զրույցում ասաց Միսակյանը: