«Ցեղակրոն» կուսակցության առաջնորդ Շանթ Հարությունյանի և նրա հետ ձերբակալվածների դատական առաջին իսկ նիստերը լարված մթնոլորտում են անցնում:
Շանթ Հարությունյանը նույնիսկ ընդհարվեց ամբաստանյալներից Տիգրան Պետրոսյանի հետ (Հեթանոս Տիկո): Հարությունյանին զայրացրել էր փաստաբան Արա Զաքարյանի ելույթը, որտեղ նա ասել է, որ Տիգրան Պետրոսյանին ներկայացված մեղադրանքն անհիմն է, իսկ նրան կալանքի տակ պահելը՝ անօրինական։
Երբ փաստաբանը սկսեց ներկայացնել Տիգրան Պետրոսյանի արժանիքները, Շանթ Հարությունյանը տեղից բղավեց. «Տիկո, էս ի՞նչ եք անում, էս էստեղ ի՞նչ կապ ունի, ուզում ա՝ Սոս Սարգսյանը լինի, մի հատ երկուսդ եկեք էստեղ, խոսանք»։
«Առաջին լրատվական»-ի հետ զրույցում Շանթ Հարությունյանի հետ ձերբակալվածների հարազատները միանշանակ կարծիք չհայտնեցին՝ անհրաժեշտ է փաստաբան, թե ոչ: Նրանց դիտարկմամբ՝ այս գործի շրջանակներում արդեն իսկ կա քաղաքական որոշում:
Ամբաստանյալներից Լիպարիտ Պետրոսյանի կինը՝ Ռուզաննա Թեյմուրյանը, նշեց, որ իր կարծիքով ՝ փաստաբան հարկավոր է, որովհետև որքան էլ տղաները իրենց կարողանան պաշտպանել, իրավաբանական կողմը չեն կարող ներկայացնել․ «Ես համաձայն եմ պաշտպանելու առումով՝ իրենք պետք է իրենց պաշտպանեն»:
Ինչ վերաբերում է դատական նիստերին, ապա մեր զրուցակիցը նշեց, որ դատավորը հիմա հանգիստ է վարում դատավարությունը․ «Ինձ դուր չեկավ պարզապես Շանթի և իր տղայի հետ կապված ոստիկանների միջամտությունը: Դատավորն ասաց, որ Շանթի տղան իրավունք ունի նստի իր կողքը, ի՞նչ կարիք կար նման իրավիճակ ստեղծել»:
Նա նշեց, որ իր ամուսինը ևս այն կարծիքին է, որ փաստաբաններն իրենց օգնել չեն կարող, ամեն ինչ վերևից հրամայված է․ «Բայց ամեն դեպքում ինքն էլ համաձայն է, որ իրավական կողմ լինի: Հիմա նա որոշել է ուսումնասիրել, ես նրան գրքեր պետք է փոխանցեմ, ես կարծում եմ՝ փաստաբանը մնում է փաստաբան և պետք է լինի»:
Մեր զրուցակցի խոսքերով՝ եթե կա որոշում նրանց ազատազրկելու, ապա փաստաբանները ոչնչով չեն կարողանա օգնել․ «Սա քաղաքական գործ է, որ ուզում են խուլիգանականի վերածել, բայց նրանք սրտացավ քաղաքացիներ են»:
Տիկին Ռուզաննան ընդգծեց նաև, որ Շանթ Հարությունյանի և Տիգրան Պետրոսյանի միջև այդ հարցով իրականում վիճաբանություն չկա, պարզապես լարված իրավիճակում թեթև ընդհարում է եղել․ «Տիգրանը շատ հայրենասեր տղա է, դեռ Մոսկվայում իմ ամուսինը նրա հետ ծանոթացել է ու միասին ցույցի են մասնակցել, մի թեթև ընդհարումը ոչինչ չի նշանակում»:
Ամբաստանյալներից Ալբերտ Մարգարյանի կինը՝ Աննա Մարգարյանը, «Առաջին լրատվական»-ի հետ զրույցում ասաց, որ իր դիտարկմամբ՝ ամեն ինչ կանխորոշված է, և ոչ մի փաստաբան էլ իրենց հարազատներին օգնել չի կարող․ «Միտումնավոր գործողություններ են անում, որ դատապարտեն, ես կարծում եմ՝ վաղուց ամեն ինչ էլ որոշել են»:
Լուսանկարը` PAN Photo-ի