Կիրակի օրը Լիբիայի զինվորական ղեկավարությունը հայտարարել է կրակի միակողմանի դադարեցման մասին, ինչը կարող է նշանակել, որ Մուամար Քադաֆին եզրեր է փնտրում բանակցություններ սկսելու համար: Սակայն հակաքադաֆիական կոալիցիայի ներկայացուցիչները հայտարարում են, որ հակված չեն հավատալու Քադաֆիին, քանի որ վերջինս ՄԱԿ-ի 1973 բանաձևի ընդունումից հետո էլ հայտարարում էր կրակի դադարեցման մասին, սակայն իրականում շարունակեց հարձակումը Բենղազիի վրա:
Reuters գործակալությունը հաղորդում է, որ երեկ ամբողջությամբ ավերվել է Լիբիայի առաջնորդի նստավայրերից մեկի շենքը: Ամերիկյան զինվորական իշխանությունները հաղորդել են, որ նպատակ չեն ունեցել ռմբակոծելու նստավայրը: Պենտագոնի ներկայացուցիչ գեներալ-ադմիրալ Բիլ Գորթնին ասել է, որ այդ պալատը չի մտնում ռմբակոծության ենթակա ռազմակավարական օբյեկտների ցանկի մեջ: Ամերիկացիները հայտարարում են, որ ռմբակոծությունն իրականացվել է բրիտանական զինուժի կողմից: Այդ շենքի մոտ է գտնվում նաև Քադաֆիի հայտնի վրանը, որտեղ նա սովորաբար ընդունում է իր հյուրերին:
Երեկ հայտնի են դարձել «Ոդիսևսի լուսաբացը» օպերացիան անցկացվելու է երեք փուլով. առաջին փուլում շարքից հանվելու է Լիբիայի հակաօդային պաշտպանության համակարգը, երկրորդում հարվածի թիրախ են դառնալու ռազմաօդային ուժերի բազաները, ինչպես նաև Քադաֆիի նստավայրը, իսկ երրորդում` անմիջական հարվածի տակ են ընկնելու Լիբիայի զինված ուժերի ստորաբաժանումները:
Այս գիշեր ավերվել է նաև զինված ուժերի հրամանատարական շտաբը: Այս մասին հաղորդել է France Presse գործակալությունը: Սա, ըստ կոալիցիոն ուժերի ներկայացուցչի, զգալիորեն դժվարացրել է զինված ուժերը համակարգված ղեկավարելու Քադաֆիի հնարավորությունները:
