Ճապոնիայի վնասները մարտի 11-ի երկրաշարժից և ցունամիից հետո կարող են գերազանցել 20 տրլն իենը կամ 250 մլրդ դոլարը: Այս մասին հաղորդել է Ճապոնիայի ֆինանսների նախարար Կաորու Էսանոն: Ըստ նախարարի` վնասները, փաստորեն, կգերազանցեն 1995 թ. վնասների մակարդակը, երբ ուժեղ երկրաշարժ էր գրանցվել Կոբե քաղաքում: Այն ժամանակ զոհերի թիվն անցել էր 6,000-ից: Այս մասին հաղորդում է Kyodo գործակալությունը:
Փորձագետների գնահատականները գրեթե համընկնում են պաշտոնական Տոկիոյի գնահատականների հետ: Ըստ մասնագետների` վնասները կարող են կազմել Ճապոնիայի ՀՆԱ-ի մոտ 3-4%-ը կամ 200 մլրդ դոլար:
Ճապոնիայում մեծանում է նաև զոհերի և անհայտ կորածների թիվը: Արդեն հայտնի է 21 հազար զոհվածների և անհետ կորածների մասին: Զոհերի թիվն այս ցուցակում մոտ 8 հազար է: Ընդ որում, ըստ մասնագետների` այս թիվը դեռ զգալիորեն կաճի, քանի որ փրկարարական և փլատակների մաքրման աշխատանքները դեռ երկար կշարունակվեն: