Հանրային ծառայությունները կարգավորող հանձնաժողովի այսօրվա նիստում, որի որոշմամբ՝ օգոստոսի 1-ից էլեկտրաէներգիայի սակագինը կդառնա 41.85 դրամ, ՀԱԿ պատգամավոր Արամ Մանուկյանը հարց բարձրացրեց Վրաստանից Հայաստան ներմուծվող էլեկտրաէներգիայի մասին:
«Մենք Վրաստանից հոսանք ենք առնում, երբ միշտ վաճառել ենք: 2012 թ. մենք Վրաստանից գնել ենք 85.3 մլն կվտ՝ 3 մլն 426 հազար դոլարի, 2013 թվականին՝ 72.2 մլն կվտ՝ 3 մլն դոլարի, 16 դրամ ինքնարժեքով: Երբևէ սրա մասին որևէ տեղ մի բան խոսվե՞լ է: Ցույց տվեք ձեր հաշվետվությունների մեջ: Սա ի՞նչ սենսացիա է: Ինչո՞ւ ենք Վրաստանից հոսանք գնում, երբ ունենք ինքնաբավ համակարգ»,- հարց բարձրացրեց պատգամավորը:
«Վերջին մի քանի տարվա ընթացքում միայն Երևանի ՋԷԿ-ն է Վրաստանից էլեկտրաէներգիա ներկրում: Մենք Վրաստանից ներկրվող էլեկտրաէներգիան տրանզիտ պայմաններով փոխանցում ենք Իրան»,- պատասխանելով լրագրողների հարցերին՝ ասաց Երևանի ՋԷԿ-ի տնօրեն Հովակիմ Հովհաննիսյանը՝ հավելելով. «Տարվա ընթացքում հնարավոր է՝ ստացվի այնպես, որ այդ էլեկտրաէներգիայի համապատասխան քանակ Իրանից հետ ստանանք անհրաժեշտության դեպքում: Էստեղ փող չկա կամ դա կարող ենք փոխարինել իրանական գազով՝ 1/3 հարաբերակցությամբ»:
Մանրամասները դիտեք տեսանյութում:
