«Ժառանգություն» կուսակցության 10-րդ համագումարի ընթացքում պարզ դարձով, որ վարչության մի քանի անդամներ, այդ թվում՝ առանցքային դերակատարներ Ստյոպա Սաֆարյանն ու Հովսեփ Խուրշուդյանը դուրս եկան վարչությունից:
Կուսակցության առաջնորդ Րաֆֆի Հովհաննիսյանի խոսքերով՝ դրա համար վարչության անդամները ներկայացրել են տարբեր պատճառաբանություններ:
Նկատելի է, որ կուսակցության վերջին ժամանակաշրջանի գործունեությունը տարբերվում է նախկինում որդեգրած քաղաքականությունից: Եթե կուսակցությունից պարբերաբար, գոնե հայտարարությունների տեսքով, տեղեկանում ենք, որ կողմ են Հայաստանի եվրաինտեգրմանը և սեպտեմբերի երեքի որոշումը համարում են Հայաստանի ինքնիշխանության կորուստ, ապա խորհրդարանում «Ժառանգություն» խմբակցությունը՝ ղեկավարի մակարդակով, այդ մասին լռում է՝ թերևս սա էլ համարելով հանուն ընդհանուր գաղափարի համար արված փոխզիջում:
«Ժառանգության» վարչությունից դուրս եկած Լուսինե Պետրոսյանը «Առաջին լրատվական»-ի հետ զրույցում ասաց, որ իրեն բոլորովին չի բավարարել «Ժառանգության» վերջին շրջանի գործունեությունը: Նա թեպետ նշեց, որ այս պահին կուսակցությունից դուրս գալու մտադրություն չունի, այդուհանդերձ, իր դիտարկմամբ՝ կենտրոնական գրասենյակից իր դուրս գալը կուսակցության համար շատ ավելի էական էր:
«Ինձ բոլորովին չի բավարարում «Ժառանգության» գործունեությունը: Գոհ եմ նրանից, ինչ հայտարարություններ որ արվեցին Մաքսային միության անդամակցության դեմ և հօգուտ եվրոպական ինտեգրման, մյուս կուսակցությունները դա էլ չարեցին, բայց դե, հայտարարություններից այն կողմ շատ անելիք կար, որ պետք է արվեր, սակայն չի արվել: Մենք վերջին 20 տարվա մեջ առաջին անգամ էինք այս ընտրության առջև, և ըստ իս՝ ավելի շատ անելիքի իմաստ ու անհրաժեշտություն կա, իսկ եթե չեն անում՝ չարժե ժամանակ կորցնել»:
Մեր զրուցակիցը նաև անդրադարձավ կուսակցության խորհրդարանական գործունեությանը և մեր այն հարցին՝ արդյոք խորհրդարանում հատկապես տեսանելի չէ՞, որ Հայաստանի արտաքին քաղաքական մարտահրավերների նկատմամբ կուսակցությունը բացարձակ անտարբերություն է դրսևորում, պատասխանեց. «Ընդհանրապես այդ քառյակը ձևավորվեց, երբ սկսվեց գազային պայմանագրերի դեմ բողոքը, հետագայում նաև՝ կենսաթոշակային համակարգի, բայց կենցաղային խնդիրներից զատ՝ ուրիշ ոչ մի հարց չի դրել իր առաջ: Այսինքն՝ խորհրդարանի հարթակն օգտագործվել է կենցաղային խնդիրների լուծման համար, ավելի էական հարց ո՛չ իր առջև դրել է, ո՛չ հետապնդել, ո՛չ էլ լուծել»:
Մենք փորձեցինք «Ժառանգության» նախկին գլխավոր քարտուղար Լարիսա Ալավերդյանից ևս մեկնաբանություն ստանալ «Ժառանգության» ներսի փոփոխությունների վերաբերյալ: Վերջինս դեռ երկու տարի առաջ թերթերից մեկին տված հարցազրույցում ասել էր, որ «Ժառանգության» ձեռագիրն ու ոճն այլևս առաջվանը չեն:
Լարիսա Ալավերդյանը մեզ հետ զրույցում ասաց, որ հարգանքով է վերաբերվում իր գործընկերներին, սակայն նրանց գործունեությանը տևական ժամանակ է՝ չի հետևում և չի հետաքրքրվում:
Կուսակցության վարչության նորընտիր կազմում ընդգրկված քաղաքագետ Ֆիլիպ Արզումանյանն ասաց, որ իր դիտարկմամբ՝ առաջիկայում կուսակցությունում կլինեն միայն մեթոդաբանական փոփոխություններ. «Որոշումները նոր են ընդունվում, այն ամենը, ինչ եղել է հին վարչությունում, վերանայում ենք»:
Նա նշեց, որ մշտապես կողմնակից է եղել եվրաինտեգրմանը, և իր դիտարկմամբ՝ այդ հարցում կուսակցության վարչությունը այլ որոշում չի կայացնի:
Մեր այն հարցին՝ հնարավո՞ր է հանուն ընդհանուր գաղափարի քառյակի շրջանակներում նաև այդ հարցի շուրջ զիջում լինի, Ֆիլիպ Արզումանյանն ասաց. «Քառյակը ձևավորման փուլում է, և առհասարակ՝ քառյակի լիազորությունների մեջ չի մտնում արտաքին քաղաքականությամբ զբաղվելը: Ըստ իս՝ «Ժառանգությունում» մեթոդաբանության խնդիրներից զատ՝ այլ գաղափարական փոփոխություններ չեն լինի»:
Լուսանկարը` PAN Photo-ի.