Հունիսի 18-ին Էջմիածնում հնչած կրակոցների դեպքի առիթով հարուցված գործը, որին մասնակից էին եղել երկու գեներալների եղբորորդիներն ու քրեական հեղինակություն Դոն Պիպոյի մտերիմներից Արմանը, հնարավոր է առաջիկայում փակվի կամ, ինչպես էջմիածինցիներն էին ասում՝ «ջրվի»:
«Գործը ոստիկանության հետ կարելի է փակված համարել, մնում է, որ իրենք իրենց ներքին հաշիվները մաքրեն-վերջացնեն, ինչն անխուսափելի է»,- հավատացած են էջմիածինցիները:
Բացի այդ, այս գործի շրջանակներում արդեն իսկ աշխատանքից ազատվել է Էջմիածնի ոստիկանապետ Արմեն Առաքելյանը, որին նշված պաշտոնում ոստիկանապետի հրամանով փոխարինել է ոստիկանության փոխգնդապետ Ռոման Կիրակոսյանը՝ ազատվելով ոստիկանության Երևան քաղաքի վարչության քրեական հետախուզության բաժնի պետի պաշտոնից:
«Առաջին լրատվական»-ի տեղեկություններով՝ այս փոփոխություններն անմիջականորեն կապված են կրակոցների դեպքի հետ: Նույն տեղեկությունների համաձայն՝ Էջմիածնի արդեն նախկին ոստիկանապետը Սեյրան Սարոյանի մտերիմներից է եղել, և դեպքից հետո, կրակոցներից բացի, վրեժխնդիր լինելու համար փորձել են լրացուցիչ կոմպրոմատներ հավաքել Արմանի դեմ, և անձամբ Էջմիածնի ոստիկանապետի մասնակցությամբ խուզարկություն է կատարվել Արմանի տանը: Վերջինիս քույրը, սակայն, մեծ աղմուկ է բարձրացրել, կանչել է հարևաններին և հայտարարել, որ եթե Առաքելյանն իր գրպանից ինչ-որ բան չնետի իրենց տուն, ապա ուրիշ ոչինչ չեն կարող հայտնաբերել տնից: Այդպես էլ եղել է: Խուզարկության արդյունքում ոչինչ չի հայտնաբերվել Արմանենց տանը, սակայն դրանից անմիջապես հետո Արմանի կինը և քույրը բազմաթիվ բողոքներ են ներկայացրել, ինչի արդյունքում էլ ոստիկանության պետն աշխատանքից ազատվեց:
Հիշեցնենք, որ հրաձգությունը տեղի էր ունեցել գեներալներ Մանվել Գրիգորյանի, Սեյրան Սարոյանի եղբորորդիների և մյուս կողմից՝ քրեական հեղինակություն Դոն Պիպոյի մտերիմ, Էջմիածնում քաջ հայտնի Արմանի միջև՝ վազանց կատարելու պատճառով: Գեներալ Մանվելի եղբորորդին՝ Արայիկ Գրիգորյանը, իր մեքենայով վազանց է կատարել Արմանի մեքենային, որը կանգնեցրել էր նրա մեքենան ու վիճաբանության բռնվել գեներալի եղբորորդու հետ: Առաջինը Արմանի մեքենայի վրա կրակել է Արայիկ Գրիգորյանը, ապա Արմանն է անցել հրազենի գործադրման, որից վիրավորվել էր՝ ոտքի շրջանում թեթև վնասվածք էր ստացել Սեյրան Սարոյանի եղբորորդին՝ Գևորգ Սարոյանը:
Նշենք նաև, որ դեպքից անմիջապես հետո Արմանը հեռացել էր երկրից: Այս օրերին երկրում չէ նաև Արմանի եղբայրը: Թե որտեղ են Դոն Պիպոյի մտերիմ ընկերները՝ ոչ ոք տեղյակ չէ: Երկրում է միայն Արմանի եղբոր կինը, որին դեպքից հետո գեներալները գերի էին վերցրել, և եղբայրների քույրը, ովքեր երկուսով փորձում են դիմակայել գեներալների հարձակումներին: