Վերջին մեկ-երկու ամիսը գլխավոր դատախազ Գևորգ Կոստանյանի հրահանգով գլխավոր դատախազության պատիժների և հարկադրանքի այլ միջոցների կիրառման օրինականության նկատմամբ հսկողություն իրականացնող վարչությունը տնտեսական մասով ստուգումներ է իրականացրել արդարադատության նախարարության քրեակատարողական հիմնարկներում և մի շարք խախտումներ է հայտնաբերել: Ստուգումները եղել են մանրակրկիտ և մանրազնին: Այն աստիճանի մանրակրկիտ, որ մետր առ մետր չափվել է կալանավորներին հասանելիք զուգարանի թուղթը, կշռվել կալանավորների համար պատրաստվելիք ճաշի կաթսայում առկա կարտոֆիլի քանակությունը, խցերի դիմաց կշռվել է կալանավորին հասանելիք հացի քաշը: Եվ բոլոր այդ տեղերում էլ պակասորդներ ու թերացումներ է հայտնաբերվել: Զուգարանի թուղթը 60 մետրի փոխարեն եղել է 25, կարտոֆիլը 120-ի փոխարեն 80 կիլոգրամ, հացը նույնպես համապատասխանաբեր ավելի թեթև է կշռելև սահմանվածից:
Մեր տեղեկություններով, դատախազության ստուգումների և հայտնաբերված խախատումների հիման վրա հատուկ քննչական ծառայությունը մի քանի քրեական գործ է հարուցել, որոնք այս պահին քննության փուլում են:
Նույն տեղեկությունների համաձայն, սակայն, այդ ստուգումները ոչ այնքան ՔԿՀ-ներում առկա չարաշահումները բացահայտելու նպատակ են ունեցել, որքան անձնական դրդապատճառներ են ունեցել: Այդ ստուգումները իրականացվել են բացառապես Գևորգ Կոստանյան – Հայկ Հարությունյան տարաձայնությունների կոնտեքստում: Այլ կերպ ասած՝ Կոստանյանն այս ճանապարհով փորձել է կոմպրոմատներ հավաքել Հայկ Հարությունյանի դեմ և այն աստիճան է խորացել, որ ընդհուպ սկսել է չափել դատապարտյալների հասանելիք զուգարանի թղթի մետրը: Այն դեպքում, որ քրեակատարողական վարչությունը հիմնականում գործ չունի այդ հարցերի հետ:
Բացի վերը նշված տնտեսական մասով խախտումներից և թերացումներից, դատախազությունը բավական ուշագրավ փաստեր է հայտնաբերել նաև գնումների ոլորտում, ինչն անմիջականորեն վերաբերում է նաև վերը նշվածին: Մասնավորապես, ստուգումների արդյունքում պարզվել է, որ գնումների հիմնական մասն իրականացվել է մեկ անձի միջոցով, ընդ որում՝ ոչ պատշաճ ձևով: Մասնավորապես, չի պահվել կառավարության կողմից սահմանված գնումների ցանկն ու ապրանքների չափը: Եվ եթե զուգարանի թղթի մետրը չի համապատասխանել սահմանվածին, ապա մեղավորը հենց մատակարարն է և մրցույթը շահած կազմակերպությունը: Իսկ նրանք իրենց թերացումը բացատրում են այսպես՝ ինչքանի պատվեր եղել է, այնքան են բերել:
Ինչ վերաբերում է սննդին, ապա այստեղ ՔԿ վարչության մեղքը հաստատ կա: Նրանք, օգտվելով առիթից, որ կալանավորների մեծ մասը սնվում է դրսից բերված ուտելիքով, սահմանվածից քիչ պատվեր են իջեցնում: Իսկ խնայված սննդի գումարը բնականաբար բաշխվում է հենց տենդերը շահած կազմակերպություն-մատակարար-ՔԿ վարչություն շրջանակում: ՀՔԾ-ն առաջիկայում, հարուցված գործերը «չջրելու» պարագայում, թերևս բացահայտի, թե որ օղակում են յուրացվել պետության գումարները:
«Առաջին լրատվականը» այս հարցերի հետ կապված գրավոր հարցում էր կատարել դատախազությանը: Մենք հարցրել էինք, թե քերակատարողական հիմնարկներում իրականացված ստուգումների արդյունքում ինչ խախտումներ են հայտաբերվել, խնդրել էինք տրամադրել ցանկը և նշել, թե ինչ հետևանք են ունեցել այդ խախտումները: Դատախազությունից, սակայն, երկու շաբաթ շարունակ այդպես էլ չպատասխանեցին մեր հարցմանը՝ խախտելով «Տեղեկատվության ազատության մասին» օրենքի համապատասխան դրույթը, որը նրանց պարտավորեցնում է հնգօրյա ժամկետում պատասխանել հարցմանը: Հետևաբար մենք նյութը հրապարակում ենք առանց դատախազության պատասխանի:
