ՄԱԿ-ի գրասենյակում ներկայացվեց մարդու իրավունքների պաշտպանության ազգային ռազմավարության ծրագիրը, որին ներկա Հովիկ Աբրահամյանը հայտարարեց. «Մենք այս ծրագիրը համարում ենք Հայաստանի Հանրապետությունում մարդու իրավունքների երաշխիքների ամրագրման առանցքային փուլ: Մարդու իրավունքների պաշտպանության ռազմավարությունից բխող միջոցառումների ծրագրի իրականացման մեկնարկին նվիրված այս միջոցառումն ունի խորհրդանշական կարևորություն, քանի որ ընդգծում է այն լիարժեք իրականացնելու մեր քաղաքական կամքը և ազդարարում միասնական փաստաթղթի շրջանակում մարդու իրավունքներին առնչվող միջոցառումների համագործակցված իրականացման պատրաստակամությունը»:
«Առաջին լրատվական»-ի հարցերին պատասխանում է արդարադատության փոխնախարար Արման Թաթոյանը, որն այսօր ՄԱԿ-ի հայաստանյան գրասենյակում ներկայացրեց մարդու իրավունքների պաշտպանության ազգային ռազմավարության ծրագիրը:
– Պարոն փոխանախարար, բավական թերահավատություն կա քաղաքացիական հատվածի շրջանում թե՛ ծրագրի, թե՛ դրա իրականացման հետ կապված: Արդյոք Դուք երաշխավորո՞ւմ եք, որ այս ծրագիրը պատշաճ կերպով կիրականացվի և թղթի վրա գրված հերթական ծրագիրը չի դառնա:
– Ես ընդամենը կարող եմ ասել, որ այս փուլում կա կամք, միջազգային կազմակերպությունների և հասարակական կազմակերպությունների հետ համագործակցելով, իրականացնելու ծրագրի միջոցառումները: Այդ իմաստով կարող եմ ասել, այո, մենք համագործակցում ենք մեր գործընկերների հետ:
– Այսօրվա ծրագիրը վերաբերում է մարդու իրավունքներին և խոշտանգումների դեմ պայքարին։ Որքանո՞վ, օրինակ, դրանք կբացառվեն կամ կնվազեն՝ հաշվի առնելով վերջին շրջանում քաղաքացիական ակտիվիստների դեմ բռնությունները ոստիկանության կողմից՝ Աֆրիկյաննների շենքի և լույսի սակագնի թանկացման հետ կապված:
– Ծրագիրը ընդհանրապես նախատեսում է մարդու իրավունքների պաշտպանության ոլորտում ՀՀ քաղաքականության համար միասնական սկզբունքների ձևավորում: Մեզ համար մեծ կարևորություն ունի այնպիսի միջոցառումները, որոնց իրացնելի կդարձնեն անձի իրավունքները: Եվ ցանակցած ոլորտում կարևոր նշանակում ունեն բարելավումները, որ անելու ենք:
– Իսկ ի՞նչ է փոխվելու այն իրավիճակների հետ կապված, որոնք լինում են, ասենք, Աֆրիկյանների տան մոտ:
– Դա համապատասխան մարմինների իրավասությանն է վերաբերում, և ես գնահատական չեմ կարող տալ, որքանով տեղյակ եմ, քննություն է գնում: Ծրագիրն ընդհանրապես անդրադառնում է այս ոլորտում իրավունքների ապահովմանը, բայց ես չեմ կարող ասել, թե կոնկրետ իրավիճակում ինչպիսի դեպք է տեղի ունեցել, և այդ դեպքին ինչպես են արձագանքում պետական մարմինները:
Դիտեք արդարադատության փոխնախարար Արման Թաթոյանի հետ «Առաջին լրատվական»-ի ամբողջական հարցազրույցը:
