Ինչպես արդեն տեղեկացրել ենք, Արմավիրի քաղաքապետի ընտրություններում առաջադրվել է 5 թեկնածու` գործող քաղաքապետ, ՀՀԿ-ական Ռուբեն Խլղաթյանը, ավագանու անդամ Սևակ Մինասյանը, ոչ մի տեղ չաշխատող Առնակ Գևորգյանը, Կարեն Վարդանյանը և Հայկազ Եղոյանը:
Վերջին 4 թեկնածուներն անկուսակցական են։
Հիմնականում պայքարը ծավալվում է Ռուբեն Խլղաթյանի և Սևակ Մինասյանի միջև: Վերջինիս նախընտրական շտաբից տեղեկացրին, որ առավոտյան Ռուբեն Խլղաթյանի կողմնակիցներից Տիգրան Ավետիսյանը ընտրակաշառք բաժանելիս է եղել, ինչի համար ահազանգել են ոստիկանություն:
Մեր ունեցած տեղեկություններով, Տ. Ավետիսյանը այժմ ոստիկանությունում հարցաքննվում է:
20 րոպե առաջ գործող քաղաքապետի մեկ այլ թիմակիցի` Արմիդա անունով մի կնոջ բնակարանում հայտնաբերվել է 8 ընտրողի անձնագիր: Անձնագրերը հանձնվել են ոստիկանություն, իսկ կնոջ գտնվելու վայրը այս պահի դրությամբ հայտնի չէ:
Թիվ 21 ԸԸՀ-ն առայժմ բողոք-դիմում չի ստացել, կուտակումներ են տեղամասային ընտրական կենտրոններում:
Ժամը 15-ի դրությամբ 27,431 ընտրողից ընտրություններին մասնակցել էր 7,300-ը:
Ընտրողները բողոքում են անձնագրային բաժանմունքի աշխատանքից:
Մարդկանց 9-րդ ձև չեն տրամադրվում:
Նշենք, որ այդ ձևերը փոխարինում են անձնագրին: Միաժամանակ, ընտրացուցակներում ավելացված է ընտրողների թիվը:
«Մեր բնակարաններում մարդիկ են գրանցվել, այն էլ միանգամից 5-6 հոգի, չենք էլ ճանաչում նրանց»,-բողոքում են ընտրողները:
