«Կանխենք էլեկտրաէներգիայի թանկացումը» նախաձեռնության անդամները հուլիսի 1-ին կայանալիք ակցիային ընդառաջ իրազեկման ակցիա անցկացրին: Նրանք քաղաքացիներին թռուցիկներ էին բաժանում, նաև տեղեկացնում, որ հերթական անգամ իրենց գրպանը մտնելու փորձ է արվում:
Քաղաքական վերլուծաբան Արգիշտի Կիվիրյանն «Առաջին լրատվական»-ի հետ զրույցում նշեց, թե սա այն հարցն է, որ ուղղակիորեն առնչվում է Հայաստանի ցանկացած քաղաքացու, քանի որ այդ թանկացման հետևանքով թանկանալու են բազմաթիվ ծառայություններ և ապրանքներ: «Կա պասիվություն մեր քաղաքացիների շրջանում, դա կապված է այն հանգամանքի հետ, որ տարիներ շարունակ ՀՀ քաղաքացիները պայքարի այս կամ այն դաշտում հանգել են պարտության, դա առաջացրել է զանգվածային հիասթափություն»,- ասաց նա:
Կիվիրյանի համոզմամբ` որքան շատ քաղաքացիներ վաղը ոտքի կանգնեն, այնքան ավելի մեծ է հավանականությունը, որ Հայաստանի քաղաքացու ձայնը լսելի կլինի:
Ակտիվիստ Հայկ Ավետիսյանը նշեց, թե մարդկանց պետք է ամեն կերպ կոչ անել` անտարբեր չլինել, դուրս գալ և իրենց արդար բողոքի ձայնն արտահայտել, քանի որ հակասոցիալական ու հակապետական որոշումներ կայացնելով իշխանությունները իրենց տկար և վատ քաղաքականությամբ հասցրել են նրան, որ անընդհատ գազի ու էլեկտրաէներգիայի սակագինը բարձրանում է: Ավետիսյանը վստահ է, որ միացյալ ուժերով պայքարելու, այդ պայքարը ճիշտ կազմակերպելու դեպքում հնարավոր է հասնել´ արդյունքի:
Հուլիսի 1-ին` 10:30-ին, տեղի կունենա բողոքի ակցիա ՀՀ հանրային ծառայությունները կարգավորող հանձնաժողովի շենքի մոտ: Նույն օրը 11:00-ին տեղի է ունենալու հանձնաժողովի նիստ, քննարկվելու է էլեկտրաէներգիայի թանկացումը, հավանաբար կայացվելու է վերջնական որոշում, որի հիմքերը չկան:
