«Առաջին լրատվականի» հետ զրույցում ԲՀԿ Կապանի տարածքային խորհրդի նախագահ Կամո Աբրահամյանը հերքեց քաղաքում տարածված այն խոսակցությունը, թե կոալիցիոն նոր հուշագրի ստորագրումից հետո 50 հոգի լքել են կուսակցության շարքերը:
«Ընդամենը չորս մարդ են հրաժարվել, բոլորն էլ գյուղատնտեսական համալսարանի Կապանի ուսումնական կենտրոնի ուսանողներ»,-ասում է Կ. Աբրահամյանը:
Հիշեցնենք, որ օրերս ԲՀԿ Կապանի տարածքային խորհրդից հեռացվել է նույն համալսարանի Կապանի ուսումնական կենտրոնի տնօրեն Նարինե Մովսիսյանը: Նա Սամվել Բաբայանի «Դաշինք» կուսակցության համակիրներից էր, ու անցած տարի դեկտեմբերից համալրել էր ԲՀԿ շարքերը:
Տիկին Մովսիսյանը, սակայն, իրեն անկուսակցական է համարում: Իր իսկ խոսքով, նա նույնիսկ աշխատելով «Դաշինք»-ի համար, կուսակցական չէր դարձել:
«Իմ երկրորդ կյանքում «երազանքների» կուսակցության՝ ՀՅԴ-ի անդամ եմ դառնալու, իսկ ԲՀԿ անդամ երբեք չեմ եղել։ Դիմում չեմ ներկայացրել, անդամատոմս էլ չունեմ։»,- ասում է տիկին տնօրենը:
Ն.Մովսիսյանը չի թաքցնում, որ ինքը մտադիր էր համալրելու ԲՀԿ-ի շարքերը, քանի որ հավատացել էր Գագիկ Ծառուկյանի «խոսքը գործ դարձնելու» սկզբունքին:
«Ես «50+1» գաղափարով ոգևորվել էի, նույնիսկ մարտավարություն էի մշակել, սակայն կոալիցիոն հուշագրի ստորագրումն ինձ հիասթափեցրեց։ Ես շարունակում եմ հավատարիմ մնալ իմ սկզբունքներին. պետականամետ անկուսակցական մարդ եմ»,-ասում է Ն. Մովսիսյանը՝ ավելացնելով, որ «որպես մարդ, անհատ էլի հարգում է Ծառուկյանին»։
Ն. Մովսիսյանը հավատում էր ԲՀԿ-ին, կուսակցության համագումարին է մասնակցել, ոգևորված էր, ու ԲՀԿ-ին անդամագրվելու դիմումը դեռևս իր պայուսակում է:
«Բայց արդեն կորցրել է իր արժեքը։ Իմաստ չկա»,-ասում է նա:
Մեր այն հարցին, թե եթե ԲՀԿ անդամ չէ, ապա ինչպես ստացվեց, որ ընտրվեց նույնիսկ ԲՀԿ Կապանի տարածքային խորհրդի անդամ, խորհուրդ տվեց տեղեկանալ հենց կուսակցությունից:
«Տիկին Մովսիսյանը 2010թ-ի դեկտեմբերից կուսակցության անդամ էր, հունվարին էլ ընտրվեց խորհրդի անդամ, մասնակցում էր նիստերին ու համագումարներին։ Վերջին 3 նիստից բացակայել է, այդ պատճառով էլ զրկվել է խորհրդի անդամությունից։ Կուսակցություն ընդունվելու դիմում էլ գրել էր, բայց հիմա մեզ մոտ չի։ Համոզված եմ, որ նա, այսպես ասած, «գողացել» է. չէ՞ որ խորհրդի անդամները իրավունք ունեն անարգել ծանոթանալ փաստաթղթերին»,- ասում է Կամո Աբրահամյանը։