Ռուսաստանը կասկածով է վերաբերվում ԼՂ հակամարտությունում ամերիկյան ջանքերին՝ «Առաջին լրատվական»-ի հետ զրույցում ասաց ՌԴ Պետդումայի նախկին պատգամավոր, ՌԴ քաղաքական հետազոտությունների կենտրոնի ղեկավար, ՌԴ հանրային պալատի ներկայացուցիչ, քաղաքագետ-տնտեսագետ Սերգեյ Մարկովը՝ անդրադառնալով ԼՂ հակամարտության կարգավորման անհրաժեշտության վերաբերյալ Ռուսաստանի նախագահի խորհրդական Սերգեյ Գլազևի մեկնաբանություններին:
Մասնավորապես հարցին՝ հնարավո՞ր է Ռուսաստանն առաջիկայում փորձի ԼՂ հակամարտությունը լուծել հօգուտ Ադրբեջանի այդ երկիրը եվրասիական ինտեգրացիոն պրոյեկտների ուղղությամբ գրավելու համար, եթե Գլազևը խոսում է հակամարտության շուտափույթ կարգավորման և եվրասիական ինտեգրացիոն պրոյեկտներին Ադրբեջանի մասնակցության անհրաժեշտության շուրջ, Մարկովը պատասխանեց, որ դեռևս ընդհանուր ենթադրություններ են սրանք, քանի որ դեռ Ռուսաստանի համար բարդ է Ադրբեջանի և Հայաստանի միջև հակամարտությունը լուծել՝ոչ միայն Եվրասիական պրոյեկտները չվնասելու համար, այլև այն պատճառով, որ հակամարտությունը խնդիրներ է առաջացնում ողջ տարածաշրջանի անվտանգության համար, և ցանկացած պահի ինչ-որ բան կարող է պայթել, ինչ-որ մի բան այն չլինել, և որպեսզի դա տեղի չունենա, պետք չէ անընդհատ ուշադրության կենտրոնում պահել հակամարտությունը:
«Ես կարծում եմ, որ հակամարտության կարգավորումը երկու կողմերի շահերից է բխում: Հայաստանում տարածքները շատ են. Հայաստանը վերահսկում է Արցախը, նաև հավելյալ Արցախի շուրջ ադրբեջանական շրջանները, և միևնույն ժամանակ Հայաստանը թերություն ունի՝ անվտանգության պակաս, քանի որ հակամարտությունը կարգավորված չէ, պատերազմի սպառնալիք կա, երկրորդ հերթին Հայաստանում կան կոմունիկացիոն ռեսուրսների թերություններ: Հայաստանը գտնվում է դե ֆակտո բլոկադայում՝ և Թուրքիայի, և Ադրբեջանի կողմից, ուստի հակամարտության կարգավորումը նաև Հայաստանին է ձեռնտու: Ռուսաստանը ոչ այնքան փոքրիկ տակտիկական շահեր է դիտարկում, որքան մեծ շահեր, որ տարածաշրջանը լինի կայուն վիճակում»,- ասաց Սերգեյ Մարկովը:
Անդրադառնալով հակամարտող կողմերի նախագահների հնարավոր փարիզյան հանդիպմանը՝ նա նշեց, որ Ռուսաստանը կասկածամտորեն է դիտարկում մյուս երկրների հակամարտությանը միջամտելու փորձերը, քանի որ Ռուսաստանում «Վաշինգտոն» բառը նույնացվում է պատերազմի հետ: «Որտեղ Վաշինգտոնն է, այնտեղ՝ պատերազմը: Ուստի ելնելով այս ամենից՝ Ռուսաստանը կասկածանքով է վերաբերվում ամերիկյան ջանքերին և միջամտությանը: Ռուսաստանը մտածում է, որ Վաշինգտոնը միջամտում է ոչ թե կարգավորելու, այլ Ռուսաստանի շուրջ հակամարտությունը պահպանելու համար՝ թույլ չտալով Ռուսաստանին վերականգնվել»,- նշեց Մարկովը: