Կառավարությունն անցյալ շաբաթ, կարելի է ասել, սենսացիոն որոշում կայացրեց Արարատյան դաշտում 70 նոր խորքային հորեր փորելու և 42 փակված հորատանցքերը բացելու մասին: Ըստ տարածքային կառավարման փոխնախարար Վաչե Տերտերյանի հիմնավորման՝ 112 խորքային հորերը կմեղմեն Ախուրյան-Արաքս ոռոգման համակարգի ջրաղբյուրներում ստեղծված 74 մլն խոր.մետր ջրի դեֆիցիտը, ինչը թույլ կտա ոռոգման ժամանակաշրջանին սակավաջուր տարածքներին լրացուցիչ մատակարարել շուրջ 44 մլն խոր.մետր ջուր:
Ըստ այդմ՝ կառավարությունը որոշեց ջրային տնտեսության պետական կոմիտեին հատկացնել 550 մլն դրամ կամ ավելի քան 1.3 մլն ԱՄՆ դոլար՝ կառավարության պահուստային ֆոնդի հաշվին՝ «Մերձափնյա», «Արաքս», «Շենիկ» և «Արմավիր» ջրօգտագործման ընկերություններին նշված ջրօգտագործողների կողմից էլեկտրաէներգիայի ծախսի դիմաց փոխհատուցում տրամադրելու համար:
Հովիկ Աբրահամյանի գլխավորած կառավարության որոշման սենսացիան այն է, որ ընդամենը ամիսներ առաջ՝ անցյալ տարվա հոկտեմբերին Տիգրան Սարգսյանի կառավարությունը հիմնավորելով ջրային կորուստները՝ որոշեց փակել 43 հորերը և դրանք փակելու համար Բնապահպանության նախարարությանը հատկացրեց 107,5 միլիոն դրամ կամ մոտ 260 հազար ԱՄՆ դոլար: Գույքագրվեցին լուծարման ենթակա շուրջ 562 ինքնաշատրվանող անօրինական խորքային հորեր:
Իսկ ընդամենը երեք ամիս առաջ Բնապահպանության նախարարության առաջարկով կառավարությունն արգելեց Արարատի և Արմավիրի մարզերում ձկնաբուծության նպատակով նոր հորատանցքերի ջրօգտագործման թույլտվությունների տրամադրումը, ինչպես նաև Արարատի և Արմավիրի մարզերի համայնքների ղեկավարների կողմից չպետք է տրամադրվեն նախկինից ջրօգտագործման թույլտվություն ունեցող, սակայն չհորատված հորատանցքերի մասով շինարարության թույլտվություններ:
Այս որոշումը բավական լուրջ ճարապարհ է անցել. ըստ կառավարության արձանագրության` որոշումը 2014 թվականի մարտի 13-ին քննարկվել է «Հայաստանի Հանրապետության նախագաի մոտ, որից հետո էլ շահագրգիռ կողմերի մասնակցությամբ, 2014 թվականի մարտի 22-ին Հայաստանի Հանրապետության փոխվարչապետ, Հայաստանի Հանրապետության տարածքային կառավարման նախարար Արմեն Գևորգյանի մոտ կայացած խորհրդակցությունների ժամանակ»: Բացի դա՝ աշխատանքային կարգով, նախագահի աշխատակազմի և Արդարադատության նախարարության հետ քննարկման արդյունքում որոշման նախագիծը լրամշակվել է և 2014 թվականի մարտի 26-ին ներկայացվել է կառավարություն: Իսկ այսօր լիովին հակառակ որոշում է կայացվում՝ առանց որևէ բացատրության:
«Սկզբից կառավարությունը՝ ի դեմս Վաչե Տերտերյանի, շատ հիմնավոր հիմնավորումներ է բերում ու փակում է Արարատյան դաշտի հորատանցքերը, հետո նույն Վաչե Տերտերյանը հիմնավորում է բերում, որ հորատանցքերը պետք է բացել, և կառավարությունը որոշում է կայացնում: Կառավարությունն այսօր մի բան է հիմնավորում, վաղը` ուղիղ դրան հակառակը»,- «Առաջին լրատվական»-ի հետ զրույցում երեկ տեսակետ հայտնեց ջրային ռեսուրսների փորձագետ Քնարիկ Հովհաննիսյանը՝ հավելելով. «Գյուղացու շահը բերելով` շահարկում են: Մենք սպառում ենք արտեզյան ջրերը: Ախր մենք բազմաթիվ հորեր ունենք, այդ հորերը կարողացա՞նք կառավարել, որ հիմա էլ լրացուցիչ հորեր են բացում: Հաշվարկ կա, որ երեք տարի այդքան ինտենսիվ չի կարելի օգտագործել ո՛չ մակերևութային ջրերը, ո՛չ ստորգետնյա: Դա է բերել նման խայտառակ վիճակի: Այղր լճի մակարդակն իջել է 1.5 մետրով, իսկ ստորգետնյա ջրերի մակարդակն իջել է մոտ 15 մետր: Արարատյան դաշտավայրի ստորգետնյա ջրավազանը էլ ավելի կսնանկանա»:
Ինչպես հայտնի է, Արարատյան դաշտի ջրավազանի խնդիրն առաջացավ հատկապես այն բանից հետո, երբ այնտեղ գործող ձկնաբուծարանները սկսեցին ինտենսիվ ավելանալ և անխնա օգտագործել արտեզյան ջրերը: 2013թ. օգոստոսի 13-ի դրությամբ, ըստ Բնապահպանության նախարարության, Արարատյան դաշտի հորատանցքերի թիվը կազմում է 3314, որից ջրօգտագործման թույլտվությամբ` 952, լուծարման ենթակա` 389, կոնսերվացման ենթակա` 993, առանց ջրօգտագործման թույլտվության` 562 և ժամկետանց ջրօգտագործման թույլտվությամբ` 418:
Թե որ պաշտոնյաներին են պատկանում Արարատյան դաշտի ձկնաբուծարանները և ովքեր են շահագրգռված այդ հարցում, բազմիցս գրվել է: Բայց որ նախագահի մոտ քննարկված և կառավարության ընդունած որոշումը կարելի է նման կերպ փոփոխել, դա արդեն, մեղմ ասած, նոնսենս է: