Ժողովրդական կուսակցության նախագահ Տիգրան Կարապետյանը մեզ հետ զրույցում նշեց, թե մեծ առումով տարբերություն չկա` ՀԱ՞Կ-ը կհասնի իշխանափոխության, իր առաջնորդած կուսակցությո՞ւնը, թե՞ «Ժառանգությունը», սակայն նկատեց, որ Հայ ազգային կոնգրեսը ցանկանում է մենաշնորհի դիրք զբաղեցնել ընդդիմադիր դաշտում։
«Այստեղ մենաշնորհի հարց է գնում։ Եթե իրենք արմատական են, ինչպես իրենց ներկայացնում են, պետք է մնային հրապարակում։ Եթե չեն մնացել, ուրեմն մոտեցումներն են փոխել, ուրեմն արդեն չեն ուզում հեղափոխություն, ուրեմն արդեն այլ ձևաչափի կողմնակից են։ Իսկ դա արդեն արմատական ընդդիմության գործելաոճ չէ։ Մղումը այստեղ պետք է լինի արդար, ոչ թե աթոռակռվի, ոչ թե հանուն պաշտոնի։ Ես, օրինակ, որևէ մի վերապահում չունեմ։ Երբեք չեմ ասել, որ գնում եմ հանուն նրա, որ դառնամ երկրի նախագահ, քանի որ ես գնում եմ հանուն ժողովրդի, հանուն արդարության։ Իսկ, եթե գոռում են Լևոն, Լևոն նախագահ դա արդեն ինքնին ասում է, որ անհատական հավակնություններ ունեն»,- նկատեց Տիգրան Կարապետյանը։
Նրա խոսքերով, թեև Ստեփան Դեմիրճյանը ժամանակին հաղթեց Ռոբերտ Քոչարյանին, բայց այսօր ինքը չի տեսնում, որ Ստեփան Դեմիրճյանը ՀԱԿ-ում ինչ-որ դիրք ունենա։
«Այսօր ՀԱԿ լիդերի հատկությունները ձևավորում է միայն Լևոն Տեր-Պետրոսյանը։ Իսկ նրա համակիրներն ասում են` հանուն Լևոն Տեր-Պետրոսյանի, հանուն նրա, իսկ մենք գնում ենք հանուն ժողովրդի, հանուն արդարության, իսկ այստեղ մեծ տարբերություն կա»,- ավելացրեց Տիգրան Կարապետյանը։