Ռուսաստանն Ադրբեջանի եվրասիական ինտեգրացիայի պատրանքներ չունի: «Առաջին լրատվական»-ի հետ զրույցում նման կարծիք հայտնեց ռուսաստանցի քաղաքագետ, հրապարակախոս ՌԴ նախագահ Վլադիմիր Պուտինի ընդդիմախոս Անդրեյ Պիոնտկովսկին՝ անդրադառնալով ԼՂ հակամարտության կարգավորման անհրաժեշտության վերաբերյալ Ռուսաստանի նախագահի խորհրդական Սերգեյ Գլազևի մեկնաբանություններին:
Մասնավորապես հարցին՝ հնարավո՞ր է Ռուսաստանն առաջիկայում փորձի ԼՂ հակամարտությունը լուծել հօգուտ Ադրբեջանի այդ երկրներին եվրասիական ինտեգրացիոն պրոյեկտների ուղղությամբ գրավելու համար, եթե Գլազևը խոսում է հակամարտության շուտափույթ կարգավորման և եվրասիական ինտեգրացիոն պրոյեկտներին Ադրբեջանի մասնակցության անհրաժեշտության շուրջ, Պիոնտկովսկին պատասխանեց, որ Գլազևի հայտարարությունների իմաստը չէր փորձի գերագնահատել, քանի որ նա շատ հայտարարություններ է անում:
«Օրինակ՝ հենց երեկ Պեսկովը ստիպված եղավ նրան հերքել, երբ Ուկրաինայի նախագահ Պորոշենկոյին Գլազևն անվանեց ֆաշիստ: Գլազևը ծայրահեղ իմպերիալիստական կերպար է Պուտինի շրջապատում: Թեև նա Պուտինի խորհրդականն է, չեմ կարծում, որ Պուտինը անվերապահորեն հետևում է Գլազևի խորհուրդներին, Գլազևն անհրաժեշտ է Պուտինին միայն նրա համար, որպեսզի վախեցնի իր արտասահմանյան գործընկերներին այդ ծայրահեղ կարծիքներով և նրա ֆոնին երևա չափավոր»,- նշեց ռուսաստանցի հրապարակախոսը:
Ինչ վերաբերում է Ադրբեջանին, ապա, նրա համոզմամբ, Մոսկվան հույսեր չի փայփայում, որ Ադրբեջանը կփոխի իր բազմավեկտոր արտաքին քաղաքականությունը և կմիանա եվրասիական ինտեգրացիոն պրոյեկտներին, որոնք այսպես թե այնպես տապալվում են, էլ չասած այն, որ Ուկրաինան ստորագրեց Ասոցացման համաձայնագիրը, իսկ Ղազախստանն ու Բելառուսը հրաժարվեցին Ռուսաստանի հետ քաղաքական միություն ստեղծելու գաղափարից և սահմանափակվեցին միայն մաքուր տնտեսական ոլորտով, այնինչ Ռուսաստանի նպատակն էր ԽՍՀՄ վերականգնումը: Պիոնտկովսկին հնարավորություն չի տեսնում, որ Ադրբեջանը փոխի իր արտաքին քաղաքականությունը: Նրա պատկերացմամբ՝ այս առնչությամբ Մոսկվայում պատրանքներ չկան: Ուստի Մոսկվան, ըստ նրա, մնում է ԼՂ հակամարտության ստատուս քվոն պահպանելու կողմնակից:
Անդրադառնալով Եվրասիական տնտեսական հանձնաժողովի վերջին նիստից հետո ՌԴ առաջին փոխվարչապետ Շուվալովի դիտարկումներին, թե եվրասիական պրոյեկտներին մասնակցելու համար Հայաստանը պետք է բանակցություններ սկսի ԱՀԿ-ի հետ, և տեսակետներին, թե Մոսկվան այսկերպ պատրվակ է ներկայացնում Հայաստանի ինտեգրացիան ձգձգելու համար՝ Անդրեյ Պիոնտկովսկին ասաց, որ Մոսկվան հասել է նրան, որ Հայաստանը մասնակցի այդ միություններին, Ռուսաստանը Հայաստանի ձեռքերը ոլորեց նույնիսկ դա ստանալու համար:
«Չէ՞ որ Հայաստանը ևս նախօրեին պետք է Ասոցացման համաձայնագիր ստորագրեր Մոլդովայի, Վրաստանի և Ուկրաինայի հետ: Աստանայում էլ, ինչպես ականատես եղանք, առաջացան անորոշ հարցեր ԼՂ կարգավիճակի հետ կապված: Մոսկվան պարզապես չի ցանկանում լարել Ադրբեջանի հետ հարաբերությունները»,- ասաց Պիոնտկովսկին՝ հավելելով, որ Հայաստանի անդամակցությունը Եվրասիական պրոյեկտներին անհրաժեշտ է Մոսկվային, Մոսկվան շատ հզոր ճնշման լծակներ ունի Հայաստանի նկատմամբ, և ի վերջո՝ հայաստանյան իշխանությունները կհամաձայնեն ռուսական պայմաններին:
Ըստ նրա ՝ եթե Հայաստանը մեկ գիշերվա ընթացքում հրաժարվեց ԵՄ հետ ասոցացումից տարիների բանակցություններից հետո, ապա պարզ է, որ Հայաստանը կկատարի ցանկացած պայման, որը Մոսկվան կդնի իր առջև:
