Գեղարքունիքի մարզի ընդհանուր իրավասության դատարանում Յուրիկ Իսկոյանի նախագահությամբ սկսվում է Գագիկ Ցոգոլակյանի գործի դատական քննությունը:
Ըստ մեղադրանքի՝ 2014 թվականի փետրվարի 27-ին, ժամը 18-ի սահմաններում Գագիկ Ցոգոլակյանը եղել է ալկոհոլային հարբածության վիճակում ու ցանկացել է վարել Ա. Գրիգորյանի, ապա Դ. Իսպիրյանի մեքենաները, սակայն վերջիններս նրան թույլ չեն տվել:
Գագիկ Ցոգոլակյանը փոխանակ շնորհակալ լինելու՝ վիրավորվել է, բորբոքվել, Գավառ քաղաքի հատուկ դպրոցի տարածք կանչել Իսպիրյանին ու Գրիգորյանի ներկայությամբ բացատրություն է պահանջել՝ իրեն մերժելու կապակցությամբ:
Գրիգորյանն ու Իսպիրյանը հեռացել են՝ չցանկանալով վիճաբանությունը խորացնել անսթափ Ցոգոլակյանի հետ:
Վերջինս, ըստ մեղադրանքի, ավելի է բորբոքվել, մոլեգնած գնացել է Գավառ քաղաքում գտնվող իր բնակարան, վերցրել իր անվամբ հաշվառված «ՏՕԶ» մոդելի որսորդական հրացանը, տասը փամփուշտներ է լիցքավորել, դուրս է եկել տնից ու գնացել դեպի Իսպիրյանի տուն:
Փողոցում, բնակելի տների հարևանությամբ ու անցորդների ներկայությամբ, բացահայտ անհարգալից վերաբերմունք դրսևորելով հասարակության նկատմամբ, երկու անգամ օդ է կրակել: Տևական ժամանակ հայհոյելով ու գոռգոռալով` տնից դուրս է կանչել Իսպիրյանին:
Վերջինիս տնեցիները նրան չեն թողել, որ դուրս գա:
Ցոգոլակյանը Իսպիրյանի տան մոտ մեկ անգամ ևս կրակոց է արձակել:
Ա. Գրիգորյանը դուրս է եկել, փորձել է հանգստացնել մոլեգնած Ցոգոլակյանին, բայց նա պահանջել է, որ Գրիգորյանը մի կողմ քաշվի, չխառնվի ու չխանգարի:
Ապա կրկին օդ է կրակել, մտել Իսպիրյանի առանձնատան բակ, զենքի փողն ուղղել է տան մուտքի դռանը ու երկու անգամ կրակել դռան ու պատուհանի ուղղությամբ:
Կրակոցների հետևանքով վնասվել են դուռը և ապակիները՝ պատճառվել է գույքային վնաս:
Սակայն ամենակարևորն այն է, որ կրակոցներից հրազենային, կոտորակային վնասվածքներ են ստացել Իսպիրյանն ու տանը գտնվող երեք կանայք:
Բարեբախտաբար, վնասվածքները ծանր չեն եղել:
Գագիկ Ցոգոլակյանին մեղադրանք է առաջադրվել զենքի գործադրմամբ կատարած խուլիգանության համար՝ ՀՀ քրեական օրենսգրքի 258 հոդվածի 4-րդ մասով:
Ցոգոլակյանի խափանման միջոցը կալանավորումն է: