Ես՝ որպես «Ժառանգություն» կուսակցության անդամ, Ռոբերտ Քոչարյանի անունը լսել չեմ ուզում, և ուրախ եմ, որ նա ասել է, թե կապ չունի քառյակի հետ, չնայած չեմ հավատում դրան՝ «Ժառանգություն» կուսակցության 10-րդ համագումարի ընթացքում «Առաջին լրատվական»-ին ասաց «Ժառանգություն» կուսակցության անդամ, նախկին պատգամավոր, Երևանի ավագանու անդամ Անահիտ Բախշյանը:
«Ռոբերտ Քոչարյանը հաստատ «Ժառանգության» հետ կապ չունի: Չասեմ բացառում եմ, բայց չի լինի որևէ համագործակցություն «Ժառանգության» և Ռոբերտ Քոչարյանի միջև՝ լինի խորհրդարանում, թե դրանից դուրս: Մյուս կուսակցությունների մասով ես չգիտեմ»,- ասաց Բախշյանը:
Անդրադառնալով Քոչարյանի վերադարձի հնարավորությանը, նա արձագանքեց. «Այո, նա ցանկություն ունի վերադառնալու: Որպես, այսպես ասած, ամենաերիտասարդ թոշակառու, իր վիճակը հասկանում եմ. աշխատող երիտասարդ մարդու համար դա տառապանք է, և նա տառապում է, ուզում է վերադառնալ: Այլ բան է, թե ինչ անուն, գործ ու հետք է թողել, որ մեր հասարակությունը ինչ-որ տեղ երազի կամ ցանկանա նրան հետ բերել: Նա ուզում է վերադառնալ, բայց հասարակությունը մերժում է, որովհետև մեր հիշողության մեջ երբեք այդ 10 տարիները չեն վերանա»:
Հարցազրույցն ամբողջությամբ՝ տեսանյութում