Լիբիայում միջազգային ուժերի ռազմական գործողությունը կրում է «Ոդիսևսի լուսաբացը» անվանումը (Oddysey Dawn, այն ներկայացվում է նաև «Ոդիսական. Լուսաբաց» անվանումով): Al-Jazeera-ի փոխանցմամբ` «Լուսաբացի ոդիսական» գործողության հրամանատար է նշանակվել ամերիկյան գեներալ Քարտեր Հեմը: Պենտագոնը հաղորդել է, որ Լիբիայի սահմանների մոտ են գտնվում 11 ռազմանավ Իտալիայից, 11` ԱՄՆ-ից, 3 սուզանավ` ԱՄՆ-ից, որից յուրաքանչյուրն ունի 100 հրթիռ, մեկական ռազմանավ Բրիտանիայից, Ֆրանսիայից և Կանադայից: Լրատվամիջոցները հայտնում են, որ ամերիկացիներն ու բրիտանացիներն առաջին ժամերի ընթացքում միայն 100-ից ավել Tomahawk տեսակի հրթիռ են բաց թողել:
Այս պահին հայտնի է, որ միջազգային ուժերը փակել են մի քանի քաղաքների օդային տարածքները, այդ թվում` Տրիպոլիի, Միսրատայի, Բենղազիի, Նատուրայի, Սաբայի:
Բացի վերոնշյալ երկրներից ռազմական գործողություններին միացել է Իսպանիան, որը երկու F18 կործանիչ է «գործուղել» Լիբիայի ուղղությամբ: Երկրի վարչապետ Խոսե Լուիս Սապատերոն հայտնել է, որ Իսպանիան պատրաստ է երկու ռազմաբազա տրամադրել դաշնակից երկրներին` Լիբիայում գործողություններն իրականացնելու համար: Նա նաև ավելացրել է, որ պատրաստ է տրամադրել սուզանավեր, ռազմանավ և հետախուզական օդանավ: Այս մասին հաղորդում է BBC-ն:
Քիչ առաջ ուղերձով հանդես է եկել ԱՄՆ նախագահ Բարաք Օբաման: Նա հայտնել է, որ պատերազմն ամենևին էլ առաջին տարբերակը չի եղել Լիբիայում ներքաղաքական հակասությունները լուծելու համար: Նա նշել է, որ Քադաֆին անտեսել է այն հնարավորությունը, որ տվել էր միջազգային հանրությունը, և չդադարեցրեց հարձակումները սեփական ժողովրդի վրա: «Այս որոշումը մեզ հեշտ չի տրվել և սկզբում մենք հույս ունեինք, որ ուժի կիրառելուն հարցը չի հասնի», ասել է Օբաման: Հաղորդում է Reuters գործակալությունը:
ՄԱԿ-ի գլխավոր քարտուղար Պան Գի Մունը հայտարարել է, որ այլևս չի վստահում այն բանին, թե ինչ են ասում Լիբիայի առաջնորդները: Նա նշել է, որ պաշտոնկան Տրիպոլին հայտարարել էր ռազմական գործողությունների դադարեցման վերաբերյալ, սակայն վստահությունը կառավարության նկատմամաբ ամբողջությամբ վերացել է: Նա նաև ավելացրել է, որ Լիբիան խախտել է ՄԱԿ-ի 1973 բանաձևը:
Այն տեղեկությունը, թե լիբիական ուժերը ֆրանսիական ռմբակոծիչ են կործանել, չի համապատասխանում իրականությանը: Այս մասին հաղորդում է France Presse գործակալությունը` հղում կատարելով Ֆրանսիայի պաշտպանության նախարարությանը: Ավելի վաղ Լիբիայի պետական հեռուստատեսությունը տեղեկացրել էր, որ Տրիպոլիի մերձակայքում ֆրանսիական ռմբակոծիչ է կործանվել: