«Ժառանգություն» խմբակցության քարտուղար Թևան Պողոսյանը ողջունելի է համարում, որ Ռոբերտ Քոչարյանը ակտիվացել է և սկսել է խոսել: Այսօր «Ժառանգություն» կուսակցության 10-րդ համագումարի ընթացքում այս մասին նա նշեց «Առաջին լրատվական»-ի հետ զրույցում:
«Շատ ողջունելի է, որ նախին պաշտոնյաները կարողանում են խոսել, չեն խուսափում»,- ասաց նա՝ հավելելով, որ լավ կլինի Հայաստանում ներկա ու նախկին բոլոր պաշտոնյաները կարողանան երկխոսության պայմաններում խնդիրները քննարկել: Դիտարկմանը, թե Քոչարյանի անունը կապվում է Հոկտեմբերի 27-ի և Մարտի 1-ի դեպքերի հետ, Թևան Պողոսյանն արձագանքեց. «Կար ժամանակ, որ ամեն ինչ կապվում էր Լևոն Տեր-Պետրոսյանի հետ, հիմա Ռոբերտ Քոչարյանի հետ, ինչ-որ ժամանակ հետո շատ բաներ կկապեն Սերժ Սարգսյանի հետ, սա նորմալ քաղաքական գործընթաց է, լավ է, որ մարդիկ խոսում են, ոչ թե՝ լռում: Լռելն է վատ, ոչ թե խոսելը»:
Հարցին՝ Ձեր կարծիքով, հանրությունն ինչպե՞ս կընդունի Ռոբերտ Քոչարյանի վերադարձը, «Ժառանգության» պատգամավորն արձագանքեց. «Դա իմ գնահատելու խնդիրը չէ, հասարակությունը պետք է գնահատի: Բոլոր քաղաքական ուժերը առաջարկում են իրենց տեսլականը, և որին հանրությունը հավանություն է տալիս, նա էլ պիտի իրականացնի իր տեսլականը: Շատ լավ կլինի, որ Հայաստանում ունենանք մրցակցային, բազմազան հանրություն և հասարակություն»:
Անդրադառնալով Քառյակի գործունեությանը՝ Թևան Պողոսյանն ասաց. «Քառյակն ունի և հաջողություններ, և անհաջողություններ. անհաջողությունների դեպքում պետք է դասեր քաղի, իսկ հաջողությունները վստահություն են ներշնչում, որ կարող ենք միասնական ուժերով խնդիրներ բարձրացնել ու ինստիտուցիոնալ միջոցներով հասնել հաջողությունների: Մենք, բնականաբար, համագործակցում ենք այն հարցերում, որոնք մեզ միավորում են: Ապագայում գուցե լինեն նոր հարցեր, որոնց շուրջ ունենանք միասնական դիրքորոշում, և ավելի մեծ խնդիրներ մեր առջև դնենք»:
Մանրամասները՝ տեսանյութում
