Մի քանի ժամ առաջ ֆրանսիական ռազմական ուղղաթիռները սկսեցին Լիբիայի տարածքի ռմբակոծությունը: Այս մասին հաղորդում է Reuters գործակալությունը: Հայտնի է, որ ոչնչացվել է Քադաֆիի զինված ուժերի 4 տանկ, որոնք գտնվել են ընդդիմության կողմից վերահսկվող Բենղազի քաղաքի մատույցներում: CNN-ը նաև տեղեկացնում է, որ Միացյալ Նահանգների զինված ուժերը նույնպես ներգրավվել են Քադաֆիի հենակետերի ռմբակոծությանը: Սուզանավերից բաց թողնված հրթիռները վերացրել են հակահրթիռային համակարգի մի քանի կետեր: Պենտագոնի հայտարարության մեջ ասվում է, որ ԱՄՆ-ն պատրաստվում է պաշտպանել իր դաշնակիցներին Լիբիայի օդային տարածքում:
Հայտնի է նաև, որ Ֆրանսիան այս գործողություններում ներգրավել է 20 ռազմական ուղղաթիռ: Վաղը Լիբիայի սահմաններին կմոտենա «Շարլ դե Գոլ» ավիակիրը: Ավելի վաղ հայտնի էր դարձել, որ Ֆրանսիայի և Իտալիայի ինքնաթիռները հետախուզական թռիչքներ են իրականացրել Լիբիայի տարածքում:
Լիբիական պետական հեռուստաընկերությունը հաղորդում է, որ արևմտյան ռազմական ինքնաթիռները ռմբակոծում են քաղաքացիական օբյեկտներ, սակայն այդ տեղեկության հաստատում դեռ չկա:
Քիչ անց ուղերձով հանդես կգա ԱՄՆ նախագահ Բարաք Օբաման: Ավելի վաղ Ֆրանսիայի նախագահ Նիկոլա Սարկոզին Փարիզում տեղի ունեցած արտահերթ գագաթաժողովից հետո, որին մասնակցում էին Քադաֆիի դեմ ռազմական գործողություններին իրենց մասնակցության մասին հայտնած երկրների ներկայացուցիչները, հայտարարել է. «Մենք ստիպված ենք գնում դաժան որոշումների, որպեսզի դադարեցնենք արյունալի խելահեղությունը, որն իրականացվում է Լիբիայում», ասել է Սարկոզին:
Նա նաև ավելացրել է, որ այս գործողություններին մասնակցում են ԱՄՆ-ն, Մեծ Բրիտանիան, արաբական երկրները և այլն: